Беларусь патрабуе ад Чэхіі выдаць Міхалевіча
Беларускія праваахоўнікі падалі запыт на экстрадыцыю Алеся Міхалевіча, які мае ў Чэхіі статус палітуцекача.
У гарадской пракуратуры Прагі сёння адбылося папярэдняе знаёмства са справай па экстрадыцыі экс-кандыдата ў прэзідэнты.Як паведаміў Міхалевіч у жывым эфіры Еўрарадыё, яго вінавацяць у масавых беспарадках разам з Наталляй Радзінай, Алегам Корбанам і іншымі асобамі, з каго ўжо знятыя абвінавачанні.
Чэшскі суд яшчэ будзе разглядаць справу Міхалевіча. Але сам ён кажа, што ў чэшскім правасуддзі ўпэўнены. Пагатоў, што ў Чэхіі Міхалевіч атрымаў статус палітычнага ўцекача.
Алесь Міхалевіч: "Я азнаёміўся з гэтай справай. Па выніках майго азнаямлення і запісу маіх тлумачэнняў, справа будзе перададзена ў суд. Адбудзецца судовае паседжанне, на якім, я спадзяюся, будзе прынятае рашэнне, што Чэхія адмаўляецца мяне выдаваць Беларусі".
Разам з тым, кажа экс-кандыдат у прэзідэнты, калі яго затрымаюць у Балгарыі ці Румыніі, то праваахоўнікі могуць яго затрымаць да высвятлення справы.
