БАТЭ стаў чэмпіёнам Беларусі ў дзявяты раз (відэа)

Па колькасці залатых узнагародаў у чэмпіянаце сярод каманд вышэйшай лігі БАТЭ трымае рэкорд. Таксама каманда Віктара Ганчарэнкі — першы беларускі клуб, які прайшоў у групавыя раунды Лігі чэмпіёнаў і Лігі Еўропы. Двойчы барысаўчане выйгравалі Кубак Беларусі і столькі ж — Суперкубак.

Таксама 11 лістапада салігорскі “Шахцёр” разграміў гродзенскі “Нёман” — 4:0. Гарнякі гарантавалі сабе “серабро”. Тэарэтычна яны яшчэ могуць дагнаць БАТЭ паколькасці ачкоў, але па іншых паказніках, у тым ліку па колькасці перамогаў, яны ўсё адно саступяць барысаўчанам.

10 лістапада прайшлі яшчэ тры матчы ў рамках 31-га тура першынства Беларусі. Сталічнае “Дынама” мінімальна перамагло “Гомель” — 1:0 і цяпер прэтэндуе на бронзавыя медалі.

“Белшына” разышлася са “Славіяй” у сухую нічыю — 0:0. Наваполацкі “Нафтан” перамог “Брэст” — 1:0.

Чэмпіёнамі Беларусі за мінулыя 22 сезоны станавіліся 7 каманд. Больш за ўсё перамог у БАТЭ — 9. У мінскага Дынама 7 залатых узнагарод, у мазырскай Славіі — 2, у Гомеля, Дняпра, Белшыны і Шахцёра — па адным чэмпіёнстве.

1. БАТЭ — 9 перамог
2. Дынама (Мінск) — 7
3. Славія (Мазыр) — 2
4. Дняпро (Магілёў) — 1
5. Белшына (Бабруйск) — 1
6. Гомель — 1
7. Шахцёр (Салігорск) — 1