ААН заклікае Беларусь выконваць правы чалавека
Вярхоўны камісар ААН па правах чалавека Наванэтхем Пілэй пракаментавала прысуд Васілю Парфенкову і сітуацыю з правамі чалавека ў Беларусі.
Парфянкоў быў прысуджаны да чатырох гадоў пазбаўлення свабоды "за ўдзел у масавых беспарадках", што выклікала глыбокую заклапочанасць вярхоўнага камісара.
"Судовы пераслед і пакаранне асабліва трывожнае з улікам таго, што разам з дзесяткамі іншых актывістаў ён паўстаў перад судом за рэалізацыю свайго права на свабоду мірных сходаў", — прыводзіць словы Пілэй сайт Упраўлення вярхоўнага камісара ААН па правах чалавека.
Паводле яе словаў, утрыманне пад вартай палітычных апанентаў, пераслед грамадзянскай супольнасці і запалохванне незалежных СМІ з'яўляецца сур'ёзным парушэннем правоў чалавека.
Пілэй заявіла аб працягу палітычнага і адміністрацыйнага ціску на адвакатаў, праваабаронцаў і НДА, уключаючы пазбаўленне ліцэнзіяў, арышты, допыты, ператрусы, канфіскацыю матэрыялаў, іншыя формы запалохвання.
Яна заклікала беларускія ўлады вызваліць палітвязняў, у тым ліку былых кандыдатаў у прэзідэнты, і выконваць міжнародныя абавязанні ў галіне правоў чалавека.
