"Пятая смерць за кратамі…" — Ціханоўская заклікае да абароны палітвязняў

Святлана Ціханоўская пракаментавала смерць яшчэ аднаго беларускага палітвязня. 20 лютага стала вядома пра смерць Ігара Ледніка. Ён памёр у Мінскай раённай бальніцы, куды яго прывезлі з бабруйскай калоніі № 2. Прычынай смерці стала спыненне сэрца.

"Пятая смерць за кратамі..., — піша Ціханоўская. — Гэта неверагодная несправядлівасць і трагедыя — тое, што ў турмах рэжым забівае беларусаў, якія хацелі змяніць жыццё сваёй краіны да лепшага. Вітольд Ашурак, Мікалай Клімовіч, Алесь Пушкін, Вадзім Храсько, а цяпер і Ігар Леднік сталі ахвярамі рэжыму Лукашэнкі".

Ледніка адправілі за краты з-за артыкула ў партыйным часопісе пра міжнародны нейтралітэт Беларусі (пабачылі ў ім "паклёп на Лукашэнку"). "І цягам двух гадоў мэтанакіравана забівалі — у 63-гадовага актывіста была другая група інваліднасці праз праблемы з сэрцам. Рэжым выдатна ведаў пра гэта, пазбаўляючы яго волі", — адзначае Ціханоўская.

Святлана Ціханоўская заклікае медыя, міжнародных партнёраў, праваабаронцаў "стаць на абарону палітвязняў". Яна нагадвае, што больш за дзясятку з іх "патрэбна дапамога проста цяпер", бо яны "змагаюцца за сваё здароўе і сваё жыццё ў жахлівых умовахя". "І нам неабходна аб'яднаць намаганні, каб як мага хутчэй знайсці варыянты для іх вызвалення", — піша кіраўніца Аб'яднанага пераходнага кабінета Беларусі.