Пачынаюцца здымкі "Брыгады-2"

Праз шэсць гадоў пасля выхаду першага фільма, глядацкай цікавасці і разлютаваных спрэчак крытыкаў прадзюсар "Брыгады" Аляксандр Іншакоў бярэцца за стварэнне другой часткі карціны. Аднак сіквел будзе ўжо паўнаметражным фільмам.

Пасля гучнага поспеху расійскага серыяла "Брыгада" ў 2002 годзе ўдзячныя гледачы не раз пыталіся пра магчымы працяг. Але ўсе стваральнікі нязменна адказвалі адмоўна.

Маўляў, "фінал гісторыі расставіў усё па сваіх месцах, і працяг не мае сэнсу". І ўсё ж падрыхтоўка да здымак "Брыгады 2" пачалася.

Інфармацыя, ці возьме ўдзел у здымках хтосьці з зорнага акцёрскага складу першага фільма, пакуль не выдаецца.

Нагадаю, што "Брыгада" ў год выхаду на экраны стала самым дарагім і высокабюджэтным фільмам Расіі. Бюджэт адной серыі складаў амаль 200 тысяч долараў.

Таксама серыял пабіў усе мажлівыя рэкорды па глядацкай папулярнасці і стаў першым расійскім фільмам, які дабраўся да паўфіналу прэстыжнай амерыканскай тэлеўзнагароды "Эмі".

Новай працай стваральнікі збіраюцца як мінімум паўтарыць, а як максімум перасягнуць поспех серыяла.

Фота: allstars.pp.ru