На Гомельшчыне пасля буры 27 населеных пунктаў застаюцца без электрычнасці
Такія звесткі ў "Белэнэрга" далі на 17-ю гадзіну 24 ліпеня.
На вечар 24 ліпеня ў Гомельскай вобласці без электрычнасці застаюцца 27 населеных пунктаў. Такія звесткі на 17-ю гадзіну даў агенцтву БЕЛТА намеснік галоўнага інжынера ДВА "Белэнэрга" Валерый Поршнеў.
У чацвер стыхія пакінула вёскі Калінкавіцкага і Петрыкаўскага раёна без энэргазабеспячэння. Па словах спецыяліста, у Петрыкаўскім раёне пастаўкі электраэнэргіі будуць адноўленыя бліжэйшым часам. У Калінкавіцкім раёне працы будуць завершаныя пазней.
Раней спецыялісты меркавалі аднавіць энэргазабеспячэнне ў абясточаных беларускіх вёсках да канца дня. Раней паведамлялася, што ад навальніцы з парывістым ветрам без электрычнасці засталіся 750 населеных пунктаў па ўсёй Беларусі.
