J:морс "Концерт в театре"

Дыск уяўляе сабой падборку лепшых песень J:морс розных часоў. Да таго ж на ёй ёсць 2 новыя кампазіцыі — прадстаўленыя на канцэрце "Беги" и "Просто так".
Новая "Беги" с запамінальным прыпевам цалкам можа стаць радыёхітом гэтай вясны.



Настроі новых аранжыровак рэзка змяняюцца і, часам, немагчыма распазнаць песню з першых акордаў і толькі з першымі словамі прыходзіць здагадка.

Так, і без таго кранальная "Не умирай" становіцца яшчэ больш шчымлівай. На канцэртнай пласцінцы яна прадстаўлена ў шыкоўнай акустычнай версіі з віяланчэллю. А "рокавы", трывожны пройгрыш надае песні драматызму з арыгінальнага варыянту.



Вядомы хіт "Апрель" гурт прадставіў у выглядзе гарадскога рамансу — легкадумнага, рамантычнага і задорнага. У такой аранжыроўцы, з вясновай празрыстасцю і лёгкасцю гуку, асабіста мне песня падаецца яшчэ больш светлай.



Адразу пасля сонечнага "Апреля" пачынаецца хуліганская, рок-н-рольная па тэксце і блюзавая па музыцы кампазіцыя "Поезд", — мабыць, адна з самых першых запісаных "Морсамі" песень, упершыню выдадзеная у 2000 годзе на альбоме "Ассорти". Кампазіцыя, шчодрая на драйв і эмоцыі да таго ж аздобленая прыгожым саксафонным сола ў выкананні Андрэя Кляшчова. Песня ўзнаўляе кранальную і шчырую атмасферу ранніх выступаў J:морс у маленькіх клубах.
 


На мой погляд, адзін з самых буйных поспехаў лірычных "Морсаў" — песня "Снилось" — прынясе вам шмат задавальнення ў новым гучанні з выкарыстаннем сапелкі. Пранізлівая і проста неверагодна ўдалая кампазіцыя ці, як лічаць некаторыя, рамантычны сплін.
Паветраная, з летуценнай музыкай... Тэкст "Снилось" падобны на постмадэрнісцкае апавяданне — у кожнага, па традыцыях жанру, знойдзецца сваё тлумачэнне туманнага кантэксту гэтай кампазіцыі. Мяне яна адсылае кудысьці далёка, але зусім не да "атмосферы разреженной звёздам дарить своё одиночество". Хутчэй на бязлюдныя астравы ў Ціхім акіяне. Калібры, якія "будут селиться в мятых завитушках", у гэтым вобразе вельмі дарэчы :)



На развітанне прапаную вам зусім свежую "замалёўку" на верш Барыса Штэрна — задумлівая і шчырая "Просто так"— вострыя гітарныя кроплі злёгку размалёўваюць не надта вытанчаную, простую мелодыю.



Словам, атрымалася куды цікавей, чым проста чарговая падборка хітоў.