Істотных парушэнняў выбарчай цішыні ў Польшчы не было зарэгістравана
А 17 гадзіне па польскім часе на выбарчых участках з'явілася 42% польскіх выбарцаў, паведамілі на прэс-канферэнцыі прадстаўнікі Дзяржвыбаркама Польшчы. Гэта крыху больш, чым у той жа час 2 тыдні таму (у першым туры выбараў). Па звестках Дзяржвыбаркама, ніякіх істотных парушэнняў выбарчай цішыні не зарэгістравана. Мелі месца выпадкі разклейвання і зрывання плакатаў, раздавання выбарчых лістовак і іх падкідвання ў паштовыя скрынкі.
А ў адзін з выбарчых участкаў Вроцлава ўвайшла група людзей у масках, якія пачалі абражаць аднаго з кандыдатаў. Зараз усе акалічнасці гэтага здарэння высвятляе паліцыя.
Дарэчы, на выбарчыя ўчасткі палякаў запрашалі нават кандыдаткі на Міс Польшча 2010.
50 маладых дзяўчын з усіх куткоў Польшчы рыхтуюцца да нацыянальнага конкурса прыгажосці ў мясцовасці Аўгустоў. Уласным прыкладам яны вырашылі заахвоціць мясцовых жыхароў пайсці галасаваць.
На думку кандыдатак на званне Міс Польшчы 2010, без выбараў не было б дэмакратыі. Таму ўдзельніцы конкурса прыгажосці ўсе разам прыйшлі выканаць свой грамадзянскі абавязак.
Праўда магчымасць прагаласаваць у Аўгустове мелі не ўсе прыгажуні. Некаторыя з іх не патурбаваліся раней, каб узяць адпаведную паперку ў роднай мясцовасці, а без яе прагаласаваць у іншым горадзе нельга.
