Іракцы кажуць, што мараць вярнуцца дадому, але беларускія сілавікі перашкаджаюць

Выданне Delfi.lt з'ездзіла на літоўска—беларускую мяжу і сярод 13 мігрантаў, якія знаходзяцца там, знайшло чалавека, які гаворыць па-англійску. Ён распавёў ім, што яны хочуць вярнуцца дадому, але беларускія сілавікі не даюць ім гэта зрабіць.

— Мы бачым беларускіх памежнікаў. Вы хочаце сказаць, што яны вас сюды прывезлі?

— Так.

— З Мінска?

— З Мінска.

— Вы хочаце папасці ў Літву? Вы ля самай мяжы.

— Не, мы хочам вярнуцца ў Ірак.

— Мы ведаем, што вы званілі ў амбасаду.

— Так, мы тэлефанавалі ў ірацкую амбасаду. Яны спрабуюць нам дапамагчы, мы чакаем дапамогі.

— Калі вы пойдзеце ў іншым накірунку, што гэтыя памежнікі распачнуць?

— Яны ўсюды ідуць за намі. Мы спрабавалі вярнуцца назад, але яны вяртаюць нас назад.

— Як вас сюды прывезлі?

— На ваенных грузавіках. У нас былі дзейныя візы.

— Яны ўжывалі сілу?

— Вядома, так.

— Раскажыце падрабязней.

— Выбачайце, але не магу, не магу казаць аб гэтай сітуацыі, — прыводзіць дыялог выданне.

Нагадаем, што гэтых 13 мігрантаў служба аховы дзяржмяжы Літвы выявіла некалькі дзён таму. У групе былі дарослыя мужчыны, па іх словах іх затрымалі каля аэрапорта беларускія сілавікі. Мігрантаў вымушалі ісці ў Літву, хоць самі яны мелі намер дабрацца да мяжы з Польшчай, каб потым трапіць у Заходнюю Еўропу. Мігранты размясціліся на ноч на "нейтральнай зямлі" паміж Беларуссю і Літвой, хоць такой зоны не існуе. 

Пазней аднаго з мігрантаў схапіў сабака, калі кінолага асляпілі агнямі беларускія памежнікі. 

Сёлета нелегальна перайшлі мяжу Літвы з Беларуссю звыш 4,2 тысяч мігрантаў, больш за 6 тысяч не ўпусцілі. Сітуацыя з мігрантамі ўскладнілася 8 лістапада, калі да мяжы з Польшчай з беларускага боку падышлі некалькі тысяч мігрантаў з краін Блізкага Усходу, якія жадаюць перабрацца ў ЕЗ.