Інвестары падалі ў суд на Ілана Маска
Некалькі інвестараў падалі ў суд на Ілана Маска пасля яго сенсацыйнай заявы наконт планаў скупіць акцыі Tesla і ператварыць яе ў прыватную кампанію. Заява прывяла да рэзкага росту коштаў на акцыі — праз некалькі гадзінаў пасля заявы яны падаражэлі на 11% і гандляваліся амаль па 380 долараў за штуку.
Інвестары, якія гуляюць на біржы на паніжэнне, панеслі вялікія страты — гаворка ідзе пра мільёны долараў. Цяпер яны абвінавачваюць Маска ва ўвядзенні ў зман.
Пазовы пададзеныя ў федэральны суд Сан-Францыска. Інвестары мяркуюць, што знакаміты бізнэсмен хацеў пазбавіцца ад “мядзведзяў” — інвестараў, якія гуляюць на біржы на паніжэнне. Апроч таго мяркуецца, што Ілан Маск парушыў федэральныя законы ЗША і дамогся штучнага росту коштаў на акцыі Tesla.
Маск вядомы дзіўнымі жартамі і эксцэнтрычнымі выхадкамі, таму не ўсе ўспрынялі ўсур’ёз яго намер выкупіць акцыі па 420 долараў за штуку, бо не выключана, што кампанія не мае такіх сродкаў. Згодна з заканадаўствам ЗША, акцыянерам трэба падаваць толькі праўдзівую інфармацыю, якая тычыцца дзейнасці кампаніі. Ілан Маск можа сутыкнуцца з праблемамі, калі будуць знойдзеныя доказы, што яго заява мела на мэце ўзняць кошты на акцыі Tesla, перадае ВВС.
