Дзе патусіць на выхадных 17-19 траўня? Раіць гурт Litesound

Лідар гурта Litesound Зміцер Каракін цяпер заняты працай над новым альбомам. Больш за тое, ўжо цяпер музыкі плануюць наступны, рускамоўны дыск. Казаць пра адпачынак прадстаўнікам Беларусі на “Еўрабачанні-2012” пакуль не даводзіцца. Зміцер прызнаецца, што пакуль выходзіць са студыі толькі, каб “выгуляць” замежных гасцей, калі яны ёсць. Але для слухачоў “Еўрарадыё” пагаджаецца адарвацца ад улюбёнай справы і скласці культурны адпачынак на бліжэйшыя выхадныя.

З канцэртаў Зміцер адзначае гурт Neuro Dubel у клубе “Цэнтр” ды Open Space i Hair Peace Salon у TNT. Музыка вельмі настальгуе па праграме “Танцы з зоркамі”, таму з вялікай радасцю сходзіць на “Чэмпіянат па бальных танцах” у “Мінск-Арэне”. На гэтым з канцэртамі ў Змітра ― усё!

“Стартрэк. Адплата”, ― з усмешкай пачынае з паходу па кінатэатрах лідар Litesound. ― Думаю, там будзе такая колькасць спецэфектаў, што на свіданцы можна любой дзяўчыне сказаць: а пойдзем на “Стартрэк”! Ну, не адмовіць жа яна, не пажадае ж выстаўляць сябе дурніцай!) Хоць жахі для гэтай мэты лепш, бо можна суцешыць. “Жалезны чалавек-3” ― не вельмі добра, што два аднолькавыя фільмы адначасова… Назва “21 і больш” прыцягвае, гэта камедыя, відаць, не буду яе адпраўляць ва ўтыль, пакуль няма за што. Таксама раю схадзіць на “Легенду №17”.

А вось на “Фестываль еўрапейскага кіно” Зміцер ісці не раіць. Ён аматар еўрапейскай папулярнай класікі… з Жанам Полем Бельмандо і г.д., а сучасны арт-хаўс яго не цікавіць. Маўляў, Галівуд усё праглынуў і не папярхнуўся.

“У тэатры мы ходзім рэдка, але метка, ― прызнаецца Зміцер. ― Вельмі я люблю “Рускі тэатр”. А на выхадных параю схадзіць на “Рэвізора” ў Драматычным тэатры беларускай арміі, можа, гэта будзе новае прачытанне. З задавальненнем пайшоў бы на “Шчаўкунчыка” ― выбітны класічны твор. Акурат застаўся адзін квіток для студэнта за 250 тысяч, і 6 квіткоў у лоджыях з кожнага боку па 700 тысяч. Але для мастацтва можна шмат чым ахвяраваць”.

Сярод парадаў музыкі ўсплывае і Дзяржаўны цырк. Акурат днямі ён з сябрамі выпадкова туды трапіў. Вельмі спадабалася, нават, сам не чакаў.

Зміцер уважліва прагортвае мастацкія выставы і не знаходзіць нічога цікавага. Буйных імёнаў няма, а малавядомых мастакоў, на жаль, музыка не ведае.

“Belarus Fashion Week Backstage, вось на бэк-стэйдж і варта ісці, думаю, вы разумееце чаму!) “Беларускі касцюм. Гісторыя” ― гэта вельмі цікава. Калі б былі замежнікі ў гасцях, то абавязкова павёў бы іх цэлай дэлегацыяй. Вельмі шмат чаго адбываецца ў мастацкім жыцці! Раней неяк хадзілі часта, але цяпер у нейкім пустэльніцтве знаходзімся, у творчым пошуку, таму, як кажуць, не ў тэме”.

Не раіць лідар Litesound ісці ва ўсе клубы ды бары, дзе будуць трансляваць фінал “Еўрабачання-2013”. Маўляў, хопіць ужо, колькі можна! Лепш схадзіць на які блюзавы вечар, тым больш, што акурат у “Графіці” будзе выступаць The Road Dogs.

Праўда, самі музыкі Litesound у бліжэйшы week-end наўрад ці куды выйдуць, так што, шукаць іх на пералічаных мерапрыемствах, каб узяць аўтограф ― бессэнсоўна!