Бетонныя блокі і калючы дрот: як закрывалі пункт пропуску на мяжы Латвіі з РБ

Латвійскія памежнікі апублікавалі фотарэпартаж з закрыцця пункту пропуску "Сілэнэ" на мяжы Латвіі з Беларуссю (з беларускага боку — "Урбаны"). Адбылося гэта ўвечары 19 верасня. Там, дзе яшчэ нядаўна праязджаў аўтатранспарт, усталявалі бетонныя блокі і калючы дрот.

Закрыццё памежнага пенкту тлумачыцца вялікай колькасцю выпадкаў незаконнага перасячэння мяжы з боку РБ апошнім часам, а таксама неабходнасцю перадыслакацыі рэсурсаў (40-50 памежнікаў будуць задзейнічаны для аховы мяжы ў іншых месцах). У Беларусі закрыццё "Сілэнэ" назвалі "беспадстаўным".

Цяпер на беларуска-латвійскай мяжы застаецца толькі адзін дзейны пункт пропуску — "Патэрніекі" (з беларускага боку — "Грыгароўшчына").

Калі сітуацыя з нелегальнымі мігрантамі не палепшыцца, наступным крокам уладаў Латвіі можа стаць поўнае закрыццё мяжы з Беларуссю. Раней улады Латвіі кансультаваліся па гэтай праблеме з уладамі Літвы і Польшчы.

У жніўні два пункты пропуску на мяжы з Беларуссю закрыла Літва.