Беларускія музыкі далі першы ўрок дабрачыннасці

Сродкі, атрыманыя ад правядзення дабрачыннага канцэрта "Добры фэст" пойдуць на дапамогу хворым дзецям, а таксама на набыццё гігіенічных сродкаў для дзяцей-інвалідаў Чэрвеньскага дому-інтэрнату.

Падтрымаць ідэю фэста ў мінскім "Рэактары" сабралося каля 250 чалавек. У канцэрце ўзялі ўдзел гурты Палац, ZM99, Нейра Дзюбель, B:N і IQ48. З часам, упэўнены музыканты, такіх дабрачынных імпрэзаў павінна стаць значна больш!

Аляксандр Ракавец, саліст IQ48: "Калі ўсё будзе файна — можна было б нават зрабіць працяг гэтаму фэсту ў абласных гарадах Беларусі".

Тады і людзі прызвычаюцца да такога роду імпрэзаў і сапраўды павераць у добрую справу арганізатараў і удзельнікаў.

Гурт Палац, які распачаў у гэты вечар канцэртную праграму, сыграў "дыска"-варыянт сваіх твораў.

"Вельмі важна, каб такія акцыі былі, каб іх падтрымлівалі, каб набываўся досвед, — кажа лідэр гурта Алег Хаменка. — Усё ж такі гэта, напэўна, не грошы ці лялькі, якія будуць перададзеныя дзецям. Гэта ў першую чаргу ўвага — увага да той справы, да той гераічнай працы, якую робяць выхавацелі ў гэтых інтэрнатах. Можа быць, там і не цацка трэба — трэба, каб яны адчувалі, што яны не кінутыя, што яны разам з намі і яны — такія ж людзі нашай дзяржавы, як і мы. Сёння кожны мог спрычыніцца да добрай справы".

Вядома, калі Беларусь пазіцыянуе сябе як сацыяльна-арыентаваная краіна, дабрачынных акцый павінна быць як мага больш. З той інфармацыяй, якой мы валодаем на сённяшні дзень, безумоўна, гэтых акцый нестае.

Ды і насамрэч, усе мы занятыя сваімі "важнымі" справамі і праблемамі і ўпэўненыя, што праблему дзіцячых дамоў павінна вырашаць дзяржава.

"Але хто падтрымае і падкажа дзяржаве, куды павінны ісці бюджэтныя грошы?" — пытаецца Алег Хаменка.

З такім меркаваннем згодныя і астатнія ўдзельнікі фэсту.

З выступам гурта B:N, які з'явіўся на сцэне пасля выступу Палацу і Змяі, нарэшце выраўняўся гук, а музыканты пачалі свой сэт песняй "Жыве рок-н-рол". Пасля шэрагу добра вядомых кампазіцый, B:N прэзентавалі новую песню "Жыццё маё", а таксама выканалі новую кампазіцыю разам з рэперам Вінсэнтам.

Гурт  B:N: "Мы лічым, што дабрачыннасць — вялікая справа, і мы спадзяемся, што такімі акцыямі мы сапраўды зможам дапамагчы тым дзецям, якім гэта неабходна. Калі нас запрашаюць — мы заўжды згаджаемся на такія мерапрыемствы, таму што мы верым, што дабро пераможа!"

Тым больш, што так ці інакш, лічыць Нейра Дзюбель, дабрачыннасцю музыканты займаюцца ўжо 20 гадоў:

"Таму што зарабіць рок-н-ролам у нашай краіне немагчыма. Тут пытанне грошай ніколі не стаяла. Музыкант — гэта перш за ўсё чалавек апантаны. Людзі, можа быць, яшчэ проста не вельмі прывыклі да такіх імпрэзаў".

"Будзьма міласэрнымі!" — заклікалі са сцэны і арганізатары, і удзельнікі фэсту.

Еўрарадыё таксама верыць, што "Добры фэст" ператворыцца ў серыю дабрачынных мерапрыемстваў, якія з кожным разам будуць збіраць усё больш неабыякавых людзей.

Падчас фэсту прадаваліся працы з выставы нашага улюбёнага фатографа Tarantino (Аляксандра Ждановіча) "Адваротны бок зорак". Грошы ад продажу будуць выдзеленыя на патрэбы Гарадзішчанскага дому-інтэрнату. Сайт выставы  Tarantino.by