Англія і Харватыя выйшлі ў ½ ЧС па футболе, расійская казка скончылася

Англія і Харватыя склалі другую паўфінальную пару 21-га чэмпіянату свету па футболе. 7 ліпеня англічане апынуліся на галаву вышэй за зборную Швецыі. Харваты ў няпростым паядынку зламалі супраціў зборнай Расіі.

Каманда Англіі 7 ліпеня правяла, мабыць, лепшы свой матч на цяперашнім чэмпіянаце свету. Англічане арганізавана абараняліся і канструктыўна дзейнічалі ў атацы. Забіўшы па голе ў кожным тайме (Гары Магуайр і Дэле Аллi), яны захавалі свае вароты сухімі – Пікфард адзначыўся некалькімі сейвамi. Выніковы лік – 2:0, англічане ў паўфінале.

У апошнім матчы ¼ фіналу сустракаліся зборныя Расіі і Харватыі. За дзень да гульні стала вядома, што расійскія "Сбербанк" і ВТБ спісалі $1,5 млрд пазыкі буйной харвацкай прадуктовай сеткі Agrokor. На гэтым фоне было асабліва цікава, ці змогуць харваты выйграць у расіян, якія і так ужо скокнулі вышэй за галаву, выйшаўшы ў ¼ ўпершыню ў гісторыі краіны.

У першым тайме супернікі выглядалі вартымі адзін аднаго. На 31-й хвіліне Чэрышаў моцным ударам з-за межаў штрафной вывеў зборную Расіі наперад – Субашыч толькі праводзіў мяч вачыма:

Усяго праз 8 хвілін харваты адыграліся – Манджукіч працягнуў мяч па правым флангу і навесіў на Крамарыча, які расстраляў вароты Акінфеева з лініі варатарскай пляцоўкі:

У другім тайме харваты дамінавалі на полі, валодаючы мячом 65% часу. Яны рэгулярна пагражалі варотам Акінфеева, але ўвасобіць перавагу ў забітыя галы не змаглі. Да таго ж, на апошніх хвілінах гульні атрымаў траўму (але застаўся на полі) галкіпер зборнай Харватыі Субашыч.

Гульня працягнулася ў дадатковы час. На 100-й хвіліне Віда пасля падачы вуглавога галавой праштурхнуў мяч у вароты расіян. У тых засталося 20 хвілін на тое, каб адыграцца, і яны змаглі зрабіць гэта за 5 хвілін да канца гульні: падачу са штрафнога замкнуў "бразільскі расіянін" Фернандэс, якога харвацкая абарона "забылася" ў сваёй штрафной.

А ў серыі пенальці нервы апынуліся мацнейшымі ў харватаў. Акінфееў і Субашыч адбілі па адным удары, а стрэл Фернандэса, які падарыў Расіі надзею ў самым канцы дададзенага часу, прыйшоўся міма варотаў. Выніковы лік – 2:2 (3:4) на карысць зборнай Харватыі. Як ні горка гэта ўсведамляць расійскім заўзятарам, але расійская казка на ЧС-2018 скончылася.