Аляксандр Лукашэнка правёў кадравыя перастаноўкі ва Узброеных Сілах

Аляксандр Лукашэнка шэрагам указаў зрабіў кадравыя перастаноўкі ва Узброеных Сілах, інфармуе БЕЛТА.

Кіраўнік дзяржавы прызначыў палкоўніка Андрэя Гурцэвіча начальнікам факультэта Генеральнага штаба — намеснікам начальніка Ваеннай акадэміі. Гэтым жа ўказам Лукашэнка вызваліў яго ад пасады камандуючага войскамі Заходняга аператыўна-тактычнага камандавання Ваенна-паветраных сілаў і войскаў супрацьпаветранай абароны Узброеных Сіл.

Генерал-маёра Аляксандра Вальфовіча Лукашэнка прызначыў камандуючым войскамі Паўночна-заходняга аператыўнага камандавання Узброеных Сіл. Адначасова Вальфовіч вызвалены ад пасады начальніка штаба — першага намесніка камандуючага войскамі Паўночна-заходняга аператыўнага камандавання Узброеных Сіл.

Генерал-маёр Валерый Гнілазуб прызначаны начальнікам штаба — першым намеснікам камандуючага войскамі Паўночна-заходняга аператыўнага камандавання Узброеных Сіл. Ён вызвалены ад пасады начальніка 72-га гвардзейскага аб'яднанага вучэбнага цэнтра падрыхтоўкі прапаршчыкаў і малодшых спецыялістаў Узброеных Сіл.

Палкоўнік Ігар Кароль прызначаны начальнікам 72-га гвардзейскага аб'яднанага вучэбнага цэнтра падрыхтоўкі прапаршчыкаў і малодшых спецыялістаў Узброеных Сіл.

Фота — zbroya.info