Здаюць на корм: крамы прадаюць замежную капусту, а свая гніе ў фермераў на палях
Альшанскія фермеры здаюць капусту на корм жывёле / калаж Еўрарадыё
Альшанскія фермеры вымушаныя выкідаць добрую белакачанную капусту. Цэлымі мяхамі — з машын на асфальт. Далей яна пойдзе на корм скаціне, а прымае яе дзяржава ўсяго па 5 капеек за кілаграм.
Некаторыя зусім не ўбіраюць капусту з палёў, таму што гэта нявыгадна. Тым часам Еўрарадыё знайшло ў гандлёвых сетках замежную капусту па 1,07–1,17 рубля.
Даведаліся ў фермераў, што адбываецца.
"Прасцей пераараць поле. Так шмат хто зрабіў"
Адзін з альшанскіх вытворцаў кажа, што на рынку лішак капусты, бо фермеры якраз збіраюць ураджай. Таму цана на яе на закупачным рынку ўсяго 20-30 капеек за кілаграм.
— Яе занадта шмат у нас, мала бяруць. 20-30 капеек — гэта толькі вярнуць выдаткі. І то не заўсёды. Па 5 капеек — гэта наогул чыстая страта. Тады сэнсу няма рэзаць, прасцей пусціць трактар і пераараць поле, нават не выразаць. Так з ранняй капустай шмат хто ў нас зрабіў.
Каб адбіць выдаткі і трошкі зарабіць, цана павінна быць хоць бы 50 капеек, як было месяц таму. Яшчэ больш-менш нармальна працавалася.
У Альшанскім сельвыканкаме кажуць, што таксама задаваліся пытаннем, чаму складваюцца такія цэны.
— Гэтае пытанне ў нас на кантролі. Разглядаем шляхі, умовы нашых сетак, — адзначаюць у сельвыканкаме.
Па словах альшанскага чыноўніка, праблемы з цэнамі не новыя для фермераў. Бо многае залежыць ад таго, які ўраджай у Расіі, Казахстане, Узбекістане. Калі добры, то з гэтых краін ідзе імпарт і беларусам складаней гандляваць дома, калі тут таксама сезон ураджаю. А загадзя дамовіцца з сеткамі або перапрацоўчымі прадпрыемствамі мясцовым вытворцам складана.
