За лісты з заклікам сумленна лічыць галасы студэнта асудзілі на тры гады калоніі

Тры гады калоніі агульнага рэжыму — такі прысуд атрымаў 18-гадовы брастаўчанін Раман Карпук, які навучаўся на першым курсе універсітэта. Прысуд вынесла суддзя Маскоўскага раёна Брэста Таццяна Лаўранюк, паведамляюць праваабаронцы "Вясны". 

Хлопца абвінавацілі па ч. 2 арт. 191 Крымінальнага кодэкса (перашкода ажыццяўленню выбарчых правоў, права на ўдзел у рэферэндуме). Нагодай стала тое, што ён адправіў 99 лістоў чальцам камісій па рэферэндуме ад імя "палітычных" суддзяў.

У гэтых лістах змяшчаліся заклікі падлічваць галасы сумленна, паведамляць пра парушэнні на выбарчых участках. Таксама аўтар лістоў пералічваў артыкулы Крымінальнага кодэкса з адказнасцю для фальсіфікатараў. 

На судзе хлопец патлумачыў, што ён толькі хацеў, каб галасы палічылі сумленна: "Я хацеў, каб рэферэндум прайшоў справядліва і паводле закону".

Праваабаронцы прызналі Рамана Карпука палітвязнем.