За кветкі каля мемарыялу Тарайкоўскага лекара аштрафавалі на 5800 рублёў

За кветкі каля мемарыялу Тарайкоўскага лекара аштрафавалі на 5800 рублёў

За кветкі, пакладзеныя каля народнага мемарыялу Аляксандра Тарайкоўскага каля станцыі метро "Пушкінская" ў Мінску 56-гадовую лекара-кардыёлага Вольгу Карнееву аштрафавалі на 5800 рублёў. Яе пакаралі за "парушэнне парадку арганізацыі ці правядзення масавых мерапрыемстваў", паведамляе тэлеграм-канал @viasnanazirae.

Карнеева паклала кветкі ўдзень 16 траўня. У гэты момант пад'ехаў мікрааўтобус, з якога выйшлі каля сямі амапаўцаў, адзін з якіх здымаў усё на відэа. Жанчыну затрымлівалі адразу чацвёра сілавікоў. У міліцыі склалі пратакол за "несанкцыянаванае пікетаванне". Разгляд адміністрацыйнай справы ў судзе Фрунзенскага раёна Мінска пачаўся 17 траўня, прысуд быў вынесены ў аўторак (суддзя — Марыя Ярохіна).

Сваю віну лекар не прызнала. Яна патлумачыла, што калі праходзіла міма мемарыяла, убачыла, што там мала кветак, таму спусцілася ў падземны пераход і купіла букет. Яна паклала кветкі і пайшла далей. "У мяне гуманітарная прафесія — я лекар, — гаварыла яна. — Мне не падабаецца, калі гінуць людзі. Я шаную памяць загінулых, таму і паклала туды кветкі".

Вольга Карнеева заявіла, што сведка-міліцыянер, які прыйшоў у суд, не прымаў удзел у яе затрыманні, бо затрымлівалі яе амапаўцы. У матэрыялах справы ёсць памылкі: замест фактычнага месца затрымання на вуліцы Сердзіча, напісалі вуліцу Пушкінскую. Тым не менш, жанчыну аштрафавалі.

Пратэстовец Аляксандр Тарайкоўскі быў застрэлены сілавіком 10 жніўня 2020-га падчас пратэстаў каля метро "Пушкінская". Крымінальнай справы няма дагэтуль.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі