Яшчэ адна пандэмія? Ці варта хвалявацца праз воспу малпаў

24/05/2022 - 13:59

Воспа малпаў нясе сур'ёзную пагрозу? / The Daily Beast

Воспа малпаў нясе сур'ёзную пагрозу? / The Daily Beast

Не паспеў свет выдыхнуць пасля таго, як на спад (здавалася б) пайшла пандэмія каранавіруса SARS-CoV-2, як у стужках навін з'явілася новае захворванне — воспа малпаў. У траўні яе выпадкі былі выяўленыя прыблізна ў 20 краінах, а Сусветная арганізацыя аховы здароўя склікае надзвычайную сустрэчу экспертаў для абмеркавання ўспышкі. Што такое воспа малпаў і ці варта чакаць чарговай пандэміі — Еўрарадыё спрабуе адказаць на асноўныя пытанні.

Воспа малпаў — новае захворванне?

У адрозненне ад COVID-19 воспа малпаў — ужо вядомае навуцы захворванне. У малпаў яго ўпершыню выявілі ў Даніі ў 1958 годзе, а першы выпадак заражэння чалавека быў зафіксаваны ў 1970-м.

Аж да 2003-га воспу малпаў у людзей выяўлялі толькі ў афрыканскіх краінах.

Успышкі воспы ў краінах Еўропы Дэвід Хейман, былы кіраўнік аддзела надзвычайных сітуацый СААЗ, а цяпер — вядучы дарадца арганізацыі, называе "выпадковай падзеяй", якая можа быць растлумачана... "рызыкоўнымі сексуальнымі паводзінамі" на двух вялікіх рэйвах у Іспаніі і Бельгіі.

Лячэнне ёсць? А вакцына?

Добрая навіна: пераважная большасць тых, хто заразіўся малпавай воспай, хварэюць пару тыдняў і папраўляюцца. Яшчэ адна добрая навіна: лячэнне ад воспы таксама існуе. Так, у ЗША і Еўрасаюзе закупляюць прэпарат тэкавірымат, які быў распрацаваны для каровінай воспы, але працуе і супраць роднасных вірусаў. Таксама прымяняцца могуць брынцыдафавір і добра знаёмы шмат каму ацыклавір. Але ў кожным разе лячэнне прызначаюць у лякарнях, а ў большасці хвароба праходзіць лёгка.

Акрамя таго, жыхары Беларусі, якія нарадзіліся да 1980-га, могуць быць яшчэ больш спакойныя: да гэтага года ўсіх вакцынавалі ад воспы, а, паводле апошніх звестак, вакцына эфектыўная на 85%. Прышчапіцца ад воспы можна і цяпер.

Падстаў для панікі праз малпавую воспу няма. Тым больш экспертка СААЗ Марыя фон Керкхоў падкрэслівае: захворванне не становіць сур'ёзнай небяспекі, асабліва для Еўропы. А вось кіраўнік СААЗ Адханам Гебрэесус нагадвае пра сапраўдныя праблемы: гаварыць пра заканчэнне пандэміі з каранавірусам заўчасна — таму перажываць (выконваць меры засцярогі і вакцынавацца ад COVID-19) праз гэта куды больш актуальна.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.