Выкладчыкі МДЛУ таксама далучаюцца да студэнцкай забастоўкі

Выкладчыкі МДЛУ таксама далучаюцца да студэнцкай забастоўкі

Беларускія ВНУ працягваюць далучацца да нацыянальнай забастоўкі. 26 кастрычніка пра забастоўку абвясцілі больш за 30 выкладчыкаў БДУІР. Такое ж рашэнне прынялі і супрацоўнікі МДЛУ.

— Так, і выкладчыкаў у нас [бастуе. — Еўрарадыё] болей, чым у БДУІР. Мы афіцыйна з нашымі студэнтамі з 5 верасня, і ўсе ў нас гэта ведаюць, — расказала Еўрарадыё дацэнт кафедры італьянскай мовы МДЛУ Наталля Дуліна.

Выкладчыкі МДЛУ разам са студэнтамі праводзяць мірныя акцыі пратэсту.

— У нас ужо ў некаторых вымовы і заўвагі ад кіраўніцтва.

Цяпер выкладчыкі працягваюць забастоўку разам са студэнтамі: некаторыя адмянілі заняткі. Раніцай 27 кастрычніка яны зноў удзельнічаюць у акцыі ў будынках МДЛУ.

Назваць дакладную колькасць забастоўшчыкаў суразмоўніцы Еўрарадыё складана.

— Ёсць тыя, хто працуе з замежнікамі, там нюансы. Ёсць тыя, у каго цяпер няма заняткаў і гэтак далей. Спадзяюся, што некалькі дзясяткаў, плюс супрацоўнікі, у якіх заняткаў няма, — падсумавала выкладчыца.

На мінулым тыдні Аляксандр Лукашэнка звольніў рэктарку МДЛУ Наталлю Баранаву і прызначыў на яе месца экс-дэкана факультэта нямецкай мовы Наталлю Лапцеву. Цяпер кіраўніцтва ВНУ спрабуе арганізаваць дыялог з пратэстоўцамі, але шмат студэнтаў ставіцца да такой ідэі скептычна.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі