Вольгу Брыцікаву зноў судзілі, агулам яна правядзе за кратамі 75 сутак

Вольгу Брыцікаву зноў судзілі, агулам яна правядзе за кратамі 75 сутак

Старшыню незалежнага прафсаюза на "Нафтане" Вольгу Брыцікаву зноў судзілі. На гэты раз яе пакаралі 15 суткамі адміністрацыйнага арышту за "несанкцыянаванае пікетаванне". Справу ў сераду разглядаў Наваполацкі гарадскі суд (суддзя — Зінаіда Балаболава), паведамляюць праваабаронцы.

Брыцікава ўжо два месяцы за кратамі. Яе затрымалі 27 лютага на ўчастку для галасавання на рэферэндуме. Жанчыну абвінавацілі ў фатаграфаванні бюлетэня. Прысуд — 15 сутак арышту. Аднак ужо праз некалькі дзён асудзілі паўторна, на гэты раз за надпісы на куртцы "Не вайне!". У трэці раз падставай для суда сталі паперкі з надпісамі "Не вайне!" на вокнах кватэры. Падставай для чацвёртага суда стаў пост "Не вайне!" ў Instagram.

Кожны раз Брыцікавай прызначалі пакаранне ў 15 сутак адміністрацыйнага арышту. Агулам яна правядзе за кратамі 75 сутак.

Вольга Брыцікава працавала начальнікам аддзела рэалізацыі нафтапрадуктаў на "Нафтане". У жніўні 2020-га яна стала актыўнай удзельніцай пратэстаў на прадпрыемстве. Калі праходзіў сход працоўных з удзелам тагачаснага кіраўніка Камітэта дзяржаўнага кантроля Івана Церцеля (цяпер — старшыня КДБ), якраз Брыцікава агучыла патрабаванні да ўладаў.

У канцы 2020-га Вольгу Брыцікаву звольнілі, у 2021 годзе яна стала кіраўніком незалежнага прафсаюза на "Нафтане".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі