Віцяблянка, пагражаючы пісталетам, прымушала прасіць прабачэння

Жыхарка Віцебска, пагражаючы пісталетам, патрабавала ад крыўдзіцеля прабачэнняў.

Як паведамляе прэс-служба УУС Віцебскага аблвыканкама, канфлікт пачаўся паміж удзельнікамі дзвюх кампаній, якія выпівалі — як можна зразумець па відэа, дзесьці ў кафетэрыі. 

Пакрыўдзіўшыся на чарговую фразу ў свой бок, жанчына дастала з сумачкі пісталет і пайшла да крыўдзіцеля. Яна спрабавала ўзяць яго на прыцэл і патрабавала прабачэнняў.

Работнікі ўстановы здолелі выбіць пісталет у раз'юшанай віцяблянкі. Зброю схавалі, а потым перадалі міліцыянтам. Выявілася, што гэта пнеўматычная зброя. Да міліцыянтаў жа на наступны дзень звярнуўся і пакрыўджаны мужчына. 

Супрацоўнікі крымінальнага вышуку Першамайскага РУУС Віцебска знайшлі гаспадыню пісталета. Гэта 50-гадовая віцяблянка. Яна прызналася, што напярэдадні была на эмоцыях і перажывае за свой учынак. 

Жанчына сказала, што пісталет набыла некалькі гадоў таму і насіла яго з сабой для самаабароны. На яе пачалі крымінальную справу. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.