Ва Украіну ўжо з'ехалі каля 1200 беларускіх айцішнікаў

Ва Украіну ўжо з'ехалі каля 1200 беларускіх айцішнікаў. Гэтую лічбу назваў dw.com намеснік міністра па лічбавай трансфармацыі Украіны Аляксандр Барнякоў. Паводле яго слоў, гэтыя беларусы прыехалі ва Украіну пасля прэзідэнцкіх выбараў і пратэстаў: каля 200 — у жніўні, астатнія — у верасні. "Плынь расце, таму што сітуацыя [ў Беларусі] не супакойваецца", — падкрэсліў украінскі міністр.

Дырэктар Інстытута сацыяльна-эканамічнай трансфармацыі Ілля Несхадоўскі кажа, што "калі прыехала 1200 спецыялістаў, то, груба кажучы, атрымліваецца 120 мільёнаў долараў у год дадатковых паступленняў валюты ва Украіну". Заробак ІТ-спецыяліста складае $2-7 тысяч на месяц. Украінскіх чыноўнікаў радуе, што частку гэтых грошай ён будзе траціць ва Украіне.

Як паведамляла Еўрарадыё, у пачатку кастрычніка прэзідэнт Украіны Уладзімір Зяленскі падпісаў указ аб прыцягненні на працу беларускіх айцішнікаў. Улады Беларусі ўспрымаюць яго "як відавочна несяброўскі і дыскрымінацыйны крок украінскага боку". У МЗС нашай краіны амбасадару Украіны Ігару Кізіму ўручылі ноту.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.