Ва ўкраінскім Энергадары, захопленым расіянамі, ратавальнікі выйшлі на пратэст
Супрацоўнікі пажарнай часці ў Энергадары выйшлі на пратэсную акцыю супраць расійскай акупацыі / @babel
Ва ўкраінскім горадзе Энергадар (гэта Запарожская вобласць), захопленым расійскімі войскамі, на пратэст выйшлі ратавальнікі, паведамляе рэсурс "Бабель". Яны выгналі машыны і самі сталі на плошчы перад палацам культуры "Сучаснік". Ратавальнікі пратэставалі супраць расійскай акупацыі. Але пратэст доўжыўся нядоўга — расійскія вайскоўцы разагналі акцыю.
Раней у Энергодары выкралі начальніка пажарна-ратавальнага атрада Віталя Траяна. У сераду расіяне зладзілі ператрус у яго кабінеце, а затым павезлі самога Траяна ў невядомым кірунку. Пра гэта расказаў кіраўнік Энергадара Дзмітрый Арлоў. Паплечнікі Траяна тады выказалі здагадку, што яго выкралі за адмову супрацоўнічаць з новымі ўладамі.
