Ва Украіне загаварылі пра дадатковую мабілізацыю і "другі фронт" з Беларуссю

Ва Украіне могуць правесці дадатковую мабілізацыю. Пра гэта ў інтэрв'ю SkyNews заявіў кіраўнік фракцыі "Слуга народа" ў Вярхоўнай Радзе Давід Арахамія. Прычынай ён назваў пагрозу з боку Беларусі.

Арахамія пракаментаваў намер Уладзіміра Пуціна размясціць у Беларусі тактычную ядзерную зброю.

"Гэта можа азначаць прыцягненне большай колькасці людзей у войска. Нам трэба, прынамсі, яшчэ восем брыгад, каб кантраляваць гэтую лінію фронту (мяжу з Беларуссю. — Рэд.). Гэта больш за тысячу кіламетраў", — цытуе УНІАН словы Арахаміі.

Праўда, палітык дадаў, што ва ўкраінскім вышэйшым кіраўніцтве пакуль не вераць у рэальнасць такой пагрозы. Аднак гатовым трэба быць да ўсяго.

"Мы не верым, што можа здарыцца, але ніхто не ведае. На працягу гэтага года мы даведаліся, што ніхто не ведае, што можа адбыцца. Ніхто не верыў, што Расія можа ўварвацца ў такім маштабе, але яны зрабілі гэта", — дадаў Арахамія.

Варта дадаць, што Аляксандр Лукашэнка дагэтуль ніяк не пракаментаваў заяву Пуціна.