У Жыткавіцкім раёне патанулі дзед і ўнук
У Жыткавіцкім раёне патанулі дзед і ўнук, паведамляе прэс-служба Следчага камітэта.
20 чэрвеня ў затоцы Прыпяці рыбакі заўважылі цела мужчыны. На месца здарэння выбыла следча-аператыўная група. Пры высвятленні абставінаў яго смерці ў рацэ знайшлі аўтамабіль і цела падлетка.
Папярэдне ўстаноўлена, што зранку ў панядзелак 56-гадовы жыхар Жыткавічаў разам з 15-гадовым унукам паехалі парыбачыць на Прыпяць. Са стромкага берагу машына з'ехала ў раку.
Целы загінулых і аўтамабіль дасталі з вады. Следчыя з экспертамі праводзяць агляд месца здарэння, фіксуюць следавую карціну.
