У Польшчы асцерагаюцца абвастрэння міграцыйнага крызісу праз "Славянскі базар"
"Славянскі базар у Віцебску" пройдзе з 12 па 18 ліпеня / fest-sbv.gck.by
У Польшчы асцерагаюцца абвастрэння міграцыйнага крызісу на мяжы з Беларуссю. Падставай зрабілася ўвядзенне бязвізавага ўезду для гасцей Міжнароднага фестывалю "Славянскі базар у Віцебску". Адпаведнае распараджэнне яшчэ ў сакавіку падпісаў Аляксандр Лукашэнка.
Права ўехаць у Беларусь без візы атрымалі грамадзяне 73 краін. На руках трэба мець толькі сапраўдны дакумент для выезду за мяжу і білет (можна электронны) на мерапрыемствы фестывалю. Сярод краін, чые грамадзяне могуць без візаў трапіць у Беларусь, — дзяржавы Блізкага Усходу, Афрыкі і Лацінскай Амерыкі, звярнуў увагу намеснік міністра-каардынатара спецыяльных службаў Польшчы Станіслаў Жарын.
"Спрашчэнне міграцыйных працэдур можа прывесці да павелічэння патоку людзей у Беларусь, які службы Лукашэнкі будуць выкарыстоўваць для гібрыднай аперацыі, якая праводзіцца на нашай усходняй мяжы", — выказаў меркаванне ён. Адзначым, што бязвізавы рэжым для гасцей фестывалю будзе дзейнічаць з 4 па 23 ліпеня.
