У НАУ назвалі імёны чыноўнікаў, адказных за рост падаткаў і цэн

Народнае антыкрызіснае ўпраўленне, якое ўзначальвае Павел Латушка, апублікавала спіс чыноўнікаў, адказных за прыняцце шэрагу сумнеўных заканадаўчых актаў. Перш за ўсё гаворка ідзе пра змены ў Падатковы кодэкс, праз якія выраслі падаткі, а следам — цэны на лекі і прадукты.

Папраўкі запрацавалі з 1 студзеня. Сярод іншага яны прадугледжвалі павышэнне ПДВ на ўвоз шэрагу лекаў, медвырабаў, харчовых і дзіцячых тавараў.  Толькі за студзень тавары і паслугі ў краіне падаражэлі на 1,1%. 

"Бюджэту вельмі патрэбныя грошы. Каб павысіць зарплаты чыноўнікам і забяспечыць іх пакорлівасць і лаяльнасць (што ўжо, дарэчы, зроблена), каб нарасціць фінансаванне сілавога блока: людзі, якія збіваюць суайчыннікаў на вуліцах, любяць, каб зарплата прыходзіла на картку своечасова, а лепш — яшчэ і расла. Усё гэта павінныя забяспечыць простыя беларусы — сваімі падаткамі, аплатай падаражэлых тавараў і паслуг", — адзначылі ў НАУ.

Прадстаўнікі Народнага антыкрызіснага ўпраўлення ўспомнілі яшчэ адну супярэчлівую пастанову, якая абмяжоўвае права на выезд беларусаў за мяжу.

"Вось і атрымліваецца: купляць у Беларусі — дорага, аднекуль прывезці — немагчыма", — адзначылі ў НАУ.

Таму і было прынятае рашэнне назваць імёны "тых, хто нанёс чарговы ўдар па беларускай эканоміцы, па сваіх суайчынніках і нават па сабе і сваіх блізкіх". У спісе — 143 прозвішчы, гэта міністры, кіраўнікі шэрагу ведамстваў, іх намеснікі, а таксама прадстаўнікі мясцовых уладаў.

У НАУ таксама адзначылі, што сумесна з былымі сілавікамі цяпер ідзе праца па зборы фактычных доказаў віны людзей са спісу. "Дзеянні кожнага атрымаюць прававую ацэнку", — адзначылі ў антыкрызісным кіраванні.

Варта адзначыць, што беларускі ўрад з мэтай стрымлівання інфляцыі напярэдадні падпісаў пастанову, якой па сутнасці "замарозіў" цэны на "сацыяльна значныя тавары першай неабходнасці". Цэны на 62 пазіцыі тавараў і 50 найменняў лекаў з 1 сакавіка можна будзе павышаць не больш чым на 0,2% у месяц.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.