У музеі ў Старых Дарогах зніклі бюсты Арсенневай, Геніюш, Каліноўскага

У прыватным музеі Анатоля Белага ў Старых Дарогах адбылася атака на экспанаты. Яе ініцыятаркай стала праўладная актывістка з Гродна Вольга Бондарава, перадае Радыё "Свабода". Яна кіраўніца дзвюх праўладных ініцыятыў — "Инфоспецназ" і "Антивандал".

У музеі Анатоля Белага (у тым ліку пад адкрытым небам) захоўваюцца самыя розныя экспанаты — ад твораў мастацтва і бюстаў славутых беларусаў да мэдальёнаў і газет эмігрантаў. Перад будынкам стаяць бюсты і барэльефы славутых беларусаў.

Бондаравай не спадабалася акурат вулічная экспазіцыя, якую яна назвала "русканенавісніцкай і пранацысцкай". Жанчына напісала скаргу раённаму ідэолагу Уладзіміру Дзевяценю. Але ён, як заявіла прапагандыстка, "паставіў на паўзу"

Але дзякуючы супрацоўніцтву з уладамі, як кажа Бондарава, ёй удалося прыбраць партрэты паэткі Наталлі Арсенневай, братоў Івана і Антона Луцкевічаў (якіх яна чамусьці назвала фашыстамі), Кастуся Каліноўскага, дзеячоў БНР і БЦР.

На месца, дзе быў бюст паэткі Ларысы Геніюш, паставілі іншы — праўдападобна, Якуба Коласа. Таксама былі знішчаныя некалькі барэльефаў, а некаторыя, нібыта, "правераць гісторыкі".

За дапамогу Бондарава падзякавала старшыні Пастаяннай камісіі па нацыянальнай бяспецы Нацыянальнага сходу Алегу Белаконеву, падпалкоўніку КДБ у адстаўцы Емяльяну Ляпёшку, Аляксандру Плавінскаму, а таксама "неабыякавым жыхарам Старых Дарог і чыноўнікам, якія пажадалі застацца неназванымі".