У Інданэзіі ўвялі крымінальную адказнасць за секс па-за шлюбам

У Інданэзіі ўвялі крымінальную адказнасць за секс па-за шлюбам. Забарона будзе распаўсюджвацца і на замежнікаў, піша apnews.com.

Новаўвядзенне ўтрымліваецца ў новым крымінальным кодэксе, які ў аўторак аднагалосна ўхваліў парламент Інданэзіі. За секс па-за шлюбам пагражае да аднаго года пазбаўлення волі. Караецца і сужыццё да шлюбу — да шасці месяцаў турмы. Забаронена прапаганда сродкаў кантрацэпцыі. Кодэкс захоўвае ранейшую крымінальную адказнасць за аборт. Жыхарам Інданэзіі нельга будзе абражаць прэзідэнта і віцэ-прэзідэнта, інакш іх на тры гады адправяць за краты.

Новыя патрабаванні яшчэ не пачалі дзейнічаць, паколькі кодэкс мусіць падпісаць прэзідэнт. Таксама прадугледжаны трохгадовы пераходны перыяд.