Вы тут

У "Белкнізе" "1984" Оруэла знялі з продажу, але шмат кніг "Янушкевіча"

"1984" Оруэла ў Мінску ледзь знойдзеш / Еўрарадыё

Дзяржпрапаганда спрабуе даказаць, што Мінінфарм Беларусі не забараніў кнігу-антыўтопію "1984" Джорджа Оруэла. Маўляў, кніга не небяспечная, чытайце што хочаце.

Быў загад забараняць ці не — мы не ведаем, але адно вядома дакладна: "Белкніга" прыбрала "1984" са сваіх паліц. Прадаўцы толькі разводзяць рукамі — "прычына нам невядомая". Яшчэ пару дзён таму кніга была, а цяпер няма.

Чытачы Еўрарадыё пабывалі ў некалькіх гандлёвых пунктах "Белкнігі". Оруэла там хоць адбаўляй, але "1984", якая расказвае пра свет татальнай несвабоды і тыраніі, не знайшлося.

Оруэл на любы густ, акрамя "забаронкі" / Еўрарадыё

У адной з дзяржаўных кнігарняў (не ў "Белкнізе") засталося два асобнікі "1984", астатнія чытачы размялі за некалькі дзён.

— Мы чулі інфармацыю, што "Белкніга" вяртае "1984" у продаж, — кажа прадавец дзяржкнігарні, у якой знайшліся дзве кнігі-"забаронкі" ад Оруэла. — У мяне іх [кнігі "1984"] раскупілі як гарачыя піражкі, засталося толькі дзве. Учора сапраўды іх прадавалі толькі мы. Наконт таго, ці будзем здымаць з продажу — не магу сказаць, гэта вельмі непрадказальна.

Вось яны, два запаветныя экзэмпляры! / Еўрарадыё

У прыватных кнігарнях "1984" сустракаецца куды часцей, і нават у цвёрдым пераплёце. Тыя прыватнікі, у якіх оруэлаўскай антыўтопіі на паліцах не знайшлося, тлумачаць гэта тым, што кніга даўно скончылася на складзе і больш пакуль не завезлі. Але прадаваць "1984" яны плануюць і далей.

У адной з прыватных кнігарняў знайшлося аж тры экзэмпляры. У цвёрдым пераплёце! / Еўрарадыё

Янушкевіч перамагае дзяржпрапаганду

Не паспеў кнігавыдавец Андрэй Янушкевіч адкрыць у Мінску кнігарню "Кнігаўка", як на яго накінуліся дзяржСМІ. Прапагандыстаў абурыла, што Янушкевіч прадае кнігі пра Беларусь, ды яшчэ і на беларускай мове. Маўляў, палюбуйцеся — ды там жа архіўныя фатаграфіі фашыстаў і непахвальна пра Суворава адгукаюцца!

Ад гэтых фота, размешчаных у гістарычных выданнях Янушкевіча, у недажурналістаў з дзяржаўных СМІ бамбанула не па-дзіцячы / скрыншот праўладнага тг-канала

Прапагандысты, здаецца, не зразумелі, што ілюстрацыі і змест навуковых і гістарычных кніг можа не супадаць з іх светапоглядам. Пасля візіту недажурналістаў у "Кнігаўку" Андрэя Янушкевіча арыштавалі па ўсіх канонах оруэлаўскай антыўтопіі.

Але справа Янушкевіча жыве: кнігі ягонага выдавецтва ўпрыгожваюць паліцы дзяржаўных і прыватных беларускіх кнігарняў. І нікуды адтуль, па заявах прадаўцоў, знікаць не збіраюцца.

"Гары Потэр і таемная зала" выдавецтва "Янушкевіч" у дзяржкнігарні / Еўрарадыё
"Стамбул" Архана Памука ад выдавецтва "Янушкевіч" / Еўрарадыё
"Канец адзіноты" Януша Леона Вішнеўскага ад выдавецтва "Янушкевіч" / Еўрарадыё
Габрыель Гарсія Маркес, "Восень патрыярха" выдавецтва "Янушкевіч" / Еўрарадыё

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.