У Беларусі затрымалі палітвязня, якога раней дэпартавалі ў Расію

14/04/2021 - 10:47

У Паставах 13 красавіка затрымалі былога палітвязня Андрэя Новікава, паведамляе тг-канал @strana_official. Летась ён праходзіў па справе блогера Сяргея Ціханоўскага, правёў за кратамі сем месяцаў. У канцы 2020-га Новікава раптоўна вывезлі ў Расію з забаронай вяртацца 10 гадоў.

Новікаў — ураджэнец Беларусі (з Варапаева на Пастаўшчыне), але працяглы час жыў у Расіі, служыў у міліцыі, ваяваў на Каўказе (падпалкоўнік у адстаўцы), мае грамадзянства РФ. Ён вярнуўся на радзіму, займаўся фермерствам. Удзельнічаў у стрыме Ціханоўскага, расказваў і паказваў, што сталася з Варапаева за апошнія дзесяцігоддзі (на відэа), а пасля збіраў подпісы за Святлану Ціханоўскую. Андрэя Новікава затрымалі 6 чэрвеня і прывезлі ў Мінск у СІЗА № 1. Яго абвінавацілі ў "арганізацыі і падрыхтоўцы дзеянняў, якія груба парушаюць грамадскі парадак" (ч. 1 арт. 342 КК).

Пасля дэпартацыі ў Расію Новікаў заявіў, што яго сям'я "засталася ў якасці закладнікаў". У яго на Пастаўшчыне жывуць жонка і дзве дачкі, адна з іх інвалід. Былы палітвязень рызыкнуў і прыехаў да іх. Але гэта было заўважана. Папярэдне яму інкрымінуюць арт. 371 КК "Незаконнае перасячэнне дзяржаўнай мяжы Рэспублікі Беларусь". Чакаецца, што 16 красавіка Андрэю Новікаву выставяць абвінавачванне.