У беларуса на мяжы выявілі гарбату з марыхуанай
Наркотыкі, выяўленыя на мяжы / sudexpert.gov.by
Падазроную гарбату выявілі мытнікі ў пункце пропуску "Прывалка" ў беларуса, які ехаў з Літвы на радзіму, піша прэс-служба Дзяржкамітэта судовых экспертыз.
Мытнікі канфіскавалі пакецікі з гарбатай "RELAX SU KANAPIU lapais", на якіх была выява канопляў. Экспертыза выявіла, што ў складзе заваркі былі часткі раслін роду Cannabis, якія з'яўляюцца марыхуанай.
Гродзенская рэгіянальная мытня пачала праверку па гэтым факце.
Судовыя эксперты кажуць, што нярэдка беларусы вязуць з сабой "сувеніры", на ўпакоўках якіх намаляваны ліст канопляў або расліны кока. Напрыклад, адзін чалавек вёз бутэльку з алкагольным напоем. На ёй было напісана "Cannabis", а ўнутры знаходзілася вадкасць з часткай расліны. Эксперты выявілі, што празрыстая зялёная вадкасць змяшчае наркатычны алей канабіс, а расліна ў бутэльцы — гэта частка канопляў.
У шэрагу еўрапейскіх краін афіцыйна прадаюцца гарбата, шакалад, алкаголь ды іншыя прадукты, якія змяшчаюць часткі канопляў (Cannabis). Аднак у Беларусь увоз такіх тавараў забаронены. Незаконная перавозка наркатычных сродкаў, псіхатропных рэчываў або іх аналагаў і прэкурсораў пагражае крымінальнай адказнасцю.
