Сёння крэміравалі Дзмітрыя Стахоўскага, які пакончыў жыццё самагубствам
1 чэрвеня ў Мінску крэміравалі Дзмітрыя Стахоўскага, паведамляюць праваабаронцы "Вясны".
Як распавядала Еўрарадыё, 17-гадовы падлетак учыніў самагубства, бо яго пераследавалі па абвінавачанні ў масавых беспарадках.
Пахаваннем займалася адміністрацыя каледжа лёгкай прамысловасці і комплекснай лагістыкі, дзе вучыўся Стахоўскі. Паведамляецца, што прадстаўнікі адміністрацыі зайшлі ў клас, выбралі 10 вучняў, прымусілі іх здаць тэлефоны і павезлі на крэмацыю — без тлумачэнняў.
Пра дату, час і месца крэмацыі не паведамілі ні знаёмым, ні сябрам падлетка.
Стахоўскі быў сірата, жыў у інтэрнаце. Паведамлялася, што менавіта супрацоўнікі інтэрната паказалі на яго як на ўдзельніка акцыяў пратэсту. Пасля гэтага на падлетка пачалі крымінальную справу.
У яго была прыёмная сям'я ў Італіі, куды ён прыязджаў. Маці знаходзіцца ў шокавым стане пасля навіны пра смерць хлопца.
