Вы тут

Сябры мастацкай суполкі "Пагоня" патрабуюць спыніць пераслед Алеся Пушкіна

Алесь Пушкін / З архіву Еўрарадыё

Сябры мастацкай суполкі "Пагоня" патрабуюць спыніць пераслед мастака Алеся Пушкіна. Яны лічаць, што гэта "помста ўладаў за яго іншадумства, незалежную грамадзянскую пазіцыю".

Пушкін знаходзіцца за кратамі з 30 сакавіка. На яго і кіраўніка гродзенскага "Цэнтра гарадскога жыцця" Паўла Мажэйку распачалі крымінальную справу па абвінавачанні ў "рэабілітацыі і апраўданні нацызму". Нагодай стаў партрэт пасляваеннага партызана Яўгена Жыхара, які Алесь Пушкін намаляваў і вывесіў на выставе ў Гродне. Мастак прызнаны палітвязнем. На думку праваабаронцаў, яго справа "мае крайне палітызаваны характар" і грунтуецца на ідэалагічным падмурку савецкай гістарыяграфіі. 

"Мы абураныя затрыманнем нашага паплечніка, мастака Алеся Пушкіна, — пішуць сябры мастацкай суполкі "Пагоня". — Гэта таленавіты творца, які зрабіў істотны ўнёсак у развіццё культуры і мастацтва Беларусі".

Яны лічаць нагоду, агучаную для крымінальнай справы супраць Пушкіна, незаконнай. Сябры суполкі заяўляюць, што "яго зняволенне груба парушае канстытуцыйныя правы грамадзяніна, чалавека, творцы".

Алесь Пушкін быў госцем Еўрарадыё ў праграме "Ідэя Х" (на відэа).

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.