"Суцэльны жах" у Луганскай вобласці і баі ў Марыупалі — 72-я раніца вайны
Украінскі ратавальнік на разборы завалаў у вёсцы Горанка Кіеўскай вобласці /@dsns_telegram
Расійскія войскі "не спыняюць наступальных дзеянняў ва Усходняй зоне", паведамляе з раніцы Генеральны штаб Узброеных Сіл Украіны. Актыўныя баявыя дзеянні ідуць на Данецкім і Таўрычаскім напрамках. Расіяне імкнуцца ўзяць пад кантроль Папасную (гэта населены пункт у Луганскай вобласці), спрабуюць наступаць на Ліман і Северск.
Кіраўнік Луганскай адміністрацыі Сяргей Гайдай піша, што напярэдадні расіяне абстралялі адну з апошніх АЗС на рэгіёне, а таксама размешчаную побач чыгуначную гаспадарку Севераданецкага "Азоту". Загарэліся шпалы і трава, была пагроза ўзгарання цыстэрнаў. Але выратавальнікі справіліся з сітуацыяй.
"Увогуле ў горадзе ўчора быў суцэльны жах. 16 разоў вораг адкрываў агонь па жылых кварталах і аб'ектах інфраструктуры. Гэта палова ад зафіксаванай колькасці абстрэлаў па ўсёй вобласці. Пашкоджаныя 12 дамоў, электрападстанцыя, комплекс гандлёвых збудаванняў. Маем двух загінулых", — распавядае Гайдай.
У Марыупалі працягваецца супрацьстаянне ў раёне "Азоўсталі". Паводле звестак украінскага Генштаба, расіяне пры падтрымцы авіяцыі аднавілі штурм, спрабуюць узяць завод пад кантроль.
"Праціўнік ўжо прарваўся ў завадскія памяшкання і паступова спрабуе пракрасціся ўглыб. Кожны наш крок тут жа заўважаюць дроны і абстрэльваюць з мінамётаў", — цытуе Bild аднаго з украінскі байцоў, якія застаюцца на тэрыторыі завода. Па словах мужчыны, яшчэ тыдзень яны змогуць пратрымацца, але чакаюць дапамогу трэцяй краіны.
Тым часам, з "Азоўсталі" і прылеглых раёнаў ўдалося эвакуіраваць каля 500 мірных жыхароў. Аб гэтым заявіў генеральны сакратар ААН Антоніу Гутерриш.
"Я спадзяюся, што працяг каардынацыі з Масквой і Кіевам прывядзе да большай колькасці гуманітарных паўзаў, каб забяспечыць бяспечны праход мірных жыхароў з месцаў баявых дзеянняў і дастаўку дапамогі тым, хто ў ёй востра мае патрэбу", — прыводзіць словы Гутэрыша агенцтва УНІАН.
Аб тым, што адбываецца ў Марыўпалі, які знаходзіцца пад кантролем расійскіх войскаў, распавёў журналістам дарадца мэра горада Пётр Андрушчанка. Па яго словах, горад ператвараецца ў гета. Людзі сталі цалкам бяспраўныя, і да іх ставяцца як да быдла.
"Нават на вуліцы ты не можаш знаходзіцца цяпер, калі ў цябе няма адразу двух папер: адной — аб праходжанні фільтрацыі, другой — наогул дазвол на знаходжанне на вуліцы. І гэта вельмі вялікая праблема для людзей. Фільтрацыйныя працэдуры пачынаюцца нават унутры горада. У горадзе ўладкаваныя блокпосты, якія нельга перасякаць без праверкі", — цытуе Андрушчанка УНІАН.
Кампанія Google распавяла аб сваёй падтрымцы Украіны. Ужо выдзелена $55 млн дапамогі. $35 млн сышлі непасрэдна ва Украіну, $10 пералічана польскім арганізацыям, якія працуюць з бежанцамі. Яшчэ $10 — на гуманітарныя патрэбы ўкраінскіх людзей. Акрамя таго Google выдзяляе дадатковыя сродкі на супрацьдзеянне распаўсюду недакладнай інфармацыі. Пра гэта распавёў кіраўнік падраздзялення Google у рэгіёне Еўропа, Блізкі Усход і Афрыка Мэцью Брыцін. Ён адзначыў, што распаўсюд такой інфармацыі ва ўмовах вайны становіцца "пытаннем жыцця і смерці". Пра гэта распавядае ukrinform.
Цэнтральны банк Эстоніі плануе выпусціць манету наміналам у 2 еўра з надпісам "Слава Украіне". Усе атрыманыя сродкі перададуць Нацыянальнаму банку Украіны, паведамляе "Громадське".
Дызайн манеты распрацавала жыхарка Харкава Дар'я Цітова. Яна вымушана была бегчы ад вайны. Апынулася ў Эстоніі. Дызайн манеты яшчэ павінны ўхваліць краіны ЕС і Еўракамісія. Тым не менш у Эстоніі чакаюць, што манету ўдасца выпусціць у канцы 2022 года або ў пачатку 2023 года. Усяго плануюць стварыць 2 мільёны экзэмпляраў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.