Справу журналісткі Барысевіч і доктара Сарокіна перадалі ў Мінскі гарадскі суд

Генпракуратура сцвярджае, што журналістка "праз просьбы і ўгаворы" схіліла доктара да разгалашэння лекарскай таямніцы: спачатку атрымала вусную інфармацыю, а пасля — фотакопіі медыцынскай дакументацыі.

"Распаўсюд інфармацыі, у тым ліку ілжывай, неабмежаванаму колу асоб і яе проціпастаўленне афіцыйным каментарам дзяржорганаў выклікалі грамадскі рэзананс і стварылі атмасферу недаверу да кампетэнтных службаў, — адзначае Генпракуратура. — Гэта негатыўна паўплывала на стан правапарадку і пацягнула за сабой цяжкія наступствы — прывяло да павышэння напружанасці ў грамадстве, заахвоціла грамадзян да правядзення незаконных масавых мерапрыемстваў, іншых супрацьпраўных дзеянняў".

Дзеянні Кацярыны Барысевіч кваліфікаваны па ч. 5. арт. 16 КК ("Саўдзел у злачынстве", "схіленне іншай асобы да здзяйснення злачынства") і ч. 3 арт. 178 ("Разгалошванне лекарскай таямніцы, што пацягнула цяжкія настуствы"), а Арцёма Сарокіна абвінавачваюць толькі па ч. 3 арт. 178. Ім пагражае да трох гадоў пазбаўлення волі.