Што звязвае пераможцу "Еўрабачання" Loreen і Беларусь

Двойчы пераможца "Еўрабачання", шведская спявачка Loreen ведае пра Беларусь не толькі як пра адну з краін, якая калісьці ўдзельнічала ў конкурсе. Звязваюць артыстку з нашай краінай не роднасныя сувязі, але грамадзянскія: яна актыўна цікавіцца правамі чалавека ў свеце — і імкнецца падтрымліваць розныя ініцыятывы.

У 2012 годзе, пасля першай перамогі на "Еўрабачанні", Loreen выступала на "Славянскім базары". Пасля гэтага яна не вярнулася ў Швецыю, а сустрэлася з праваабаронцамі цэнтра "Вясна" і Наталляй Пінчук — жонкай Алеся Бяляцкага, які ў той момант знаходзіўся ў турме.

"Асабліва яе цікавілі ўмовы ўтрымання Бяляцкага ў турме, колькасць палітвязняў, умовы захавання правоў чалавека, свабода слова ў Беларусі, "маўклівыя пратэсты", — пісалі летам 2012-га пра сустрэчу, якая доўжылася некалькі гадзін, у ПЦ "Вясна".

Тады ж Loreen падпісала петыцыю беларускіх праваабаронцаў з заклікам да забароны смяротнага пакарання ў Беларусі. З'явілася ў яе і цішотка з Алесем Бяляцкім — такія ў Еўропе ўвайшлі ў моду пасля прысуджэння яму Нобелеўскай прэміі міру ў 2022-м.

"Для мяне праца з правамі чалавека вельмі важная. Я добра жыву, і хачу, каб людзі вакол мелі такую ж магчымасць. І ўзаемная павага — вельмі важная рэч", — казала спявачка ў інтэрв'ю Еўрарадыё ў жніўні 2012-га.

Пазней, у 2013-м, падчас сустрэчы з карэспандэнтамі Еўрарадыё ў Швецыі Loreen зноў выказвала цікавасць да тэмы свабоды ў Беларусі і падпісала аўтограф да ўсіх беларусаў "Свабода заўсёды ў вашых сэрцах".