Што вядома пра самую перспектыўную на сёння вакцыну ад COVID-19

Нямецкая кампанія BioNTech сумесна з амерыканскай Pfizer выпусціла самую перспектыўную на сёння вакцыну ад COVID-19. Вытворцы гавораць пра яе 90-адсоткавую эфектыўнасць і вяртанне да "нармальнага жыцця" да зімы 2021 года. Хто ўжо закупіў прэпарат і што вядома пра выпрабаванні новай вакцыны?

Як вакцына працуе?

Падыход такі: у арганізм уводзяць частку генетычнага кода каранавіруса, каб падрыхтаваць нашу імунную сістэму да барацьбы з ім. Трэба зрабіць два ўколы прышчэпкі BNT162b2 з перапынкам у тры тыдні.

Клінічныя выпрабаванні паказалі, што праз тыдзень пасля другой ін'екцыі рызыка захварэць на COVID-19 зніжаецца на 90%. Адзінае: яшчэ невядома, на працягу якога часу захоўваецца імунітэт і ці будзе вакцына гэтаксама эфектыўная для пажылых людзей.

Як прайшлі выпрабаванні?

Выпрабаванні любой вакцыны праходзяць у тры фазы. У першых дзвюх вывучаюцца бяспека, пабочныя дзеянні, падбіраецца патрэбная дазіроўка. У апошняй — самай маштабнай па колькасці ўдзельнікаў — вывучаецца эфектыўнасць прышчэпкі.

Pfizer і BioNTech першымі ў свеце завяршылі фінальную фазу клінічных выпрабаванняў. Вытворцы даследавалі рэакцыі 43 538 добраахвотнікаў. Частка атрымала рэальную вакцыну, частка — плацэба.

94 добраахвотнікі ўсё ж захварэлі на каранавірус.

Хто ўжо гатовы закупіць вакцыну?

Еўракамісія абвясціла, што плануе набыць 300 мільёнаў доз BNT162b2. Таксама Financial Times піша, што кантракт на пастаўку 40 мільёнаў доз ужо заключыла Вялікабрытанія, 100 мільёнаў доз — ЗША, 10 мільёнаў — Аўстралія. Чакаецца, што першымі атрымаюць вакцыну развітыя краіны.

Да канца года Pfizer і BioNTech плануюць вырабіць 50 мільёнаў доз вакцыны, а ў 2021 годзе — 1,3 мільярда доз. Прыбытак вытворцаў можа дасягнуць 13 млрд долараў.

Значыць, каранавірус пераможаны?

Не зусім. У спецыялістаў застаецца нямала пытанняў да эфектыўнасці новай вакцыны. А менавіта: ці абароніць прышчэпка пажылых людзей і людзей з групы рызыкі, як доўга будзе захоўвацца імунітэт і ці зніжае вакцына рызыку перадачы інфекцыі ад бессімптомных носьбітаў.

Таксама праз асаблівасці BNT162b2 могуць узнікнуць праблемы з яе транспартаваннем і прымяненнем. Вакцыну трэба захоўваць пры тэмпературы, не вышэйшай за -70 градусаў па Цэльсію, і спажыць на працягу пяці дзён пасля размарозкі. Для транспартавання такой вакцыны неабходная дарагая інфраструктура. Напрыклад, Мексіка ўжо заявіла, што не гатовая набыць BNT162b2 праз адсутнасць такога абсталявання.

Ці ёсць іншыя перспектыўныя вакцыны?

Прэпарат BioNTech/Pfizer — гэта не адзіная вакцына ад COVID-19. Фінальныя фазы тэставання праходзяць 12 ухваленых СААЗ прэпаратаў, шэсць з іх папярэдне ухвалены да ўжывання ў абмежаваных маштабах.

Сёння, напрыклад, амерыканская кампанія Moderna заявіла, што яе вакцына ад каранавіруса эфектыўная на 94,5%. У найбліжэйшыя тыдні вытворца разлічвае зарэгістраваць прэпарат. Гэта вакцына захоўвае свае ўласцівасці на працягу месяца, калі яе захоўваць у звычайных халадзільніках, а пры пакаёвай тэмпературы — на працягу 12 гадзін. Гэта значна спрашчае працэс яе транспартавання ў параўнанні з вакцынай Pfizer.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.