Шайгу і Хрэнін падпісалі дакументы пра захаванне ядзернай зброі ў Беларусі

Сяргей Шайгу і Віктар Хрэнін / t.me/modmilby
Сяргей Шайгу і Віктар Хрэнін / t.me/modmilby

У Мінску адбылася сустрэча міністра абароны Беларусі генерал-лейтэнанта Віктара Хрэніна і міністра абароны Расіі генерала арміі Сяргея Шайгу. Расійскі міністр прыляцеў у Беларусь 25 траўня.

Як паведамляе прэс-служба беларускага Мінабароны, міністры падпісалі дакументы, якія вызначаюць парадак утрымання расійскай нестратэгічнай ядзернай зброі ў спецыяльным сховішчы на тэрыторыі Беларусі.

Каментуючы гэтую сустрэчу, Хрэнін заявіў: "Размяшчэнне нестратэгічнай ядзернай зброі — дзейсны адказ на агрэсіўную палітыку недружалюбных нам краін". Пры тым, што агрэсіўную палітыку праводзіць Расія, якая развязала вайну ва Украіне, і дапамагаюць у гэтым беларускія ўлады.

Хрэнін таксама паведаміў, што рэгіянальная групоўка беларуска-расійскіх войскаў узмацніла свой баявы патэнцыял такімі відамі ўзбраення, як аператыўна-тактычны ракетны комплекс "Іскандэр-М" і зенітная ракетная сістэма С-400. "Праведзенае пераабсталяванне самалётаў Су-25 з магчымасцю прымянення авіяцыйных сродкаў паражэння ў ядзерным аснашчэнні", — дадаў ён.

Шайгу заявіў, што кантроль за нестратэгічнай ядзернай зброяй, якая размяшчаецца ў Беларусі, застаецца за Расіяй, рашэнне аб прымяненні — таксама.

Пра тое, што ў Беларусі плануецца размясціць расійскую тактычную ядзерную зброю, у сакавіку заявіў Уладзімір Пуцін. Будаўніцтва спецсховішча мяркуюць скончыь да 1 ліпеня 2023 года.

Пастаянны прадстаўнік Беларусі пры ААН Валянцін Рыбакоў нядаўна заявіў, што ядзерную зброю ў Беларусь дагэтуль не прывезлі. Кіраўнікі краін "Вялікай сямёркі" на нядаўнім саміце ў Японіі назвалі небяспечным і непрымальным намер размясціць у Беларусі расійскую ядзерную зброю.
 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі