Пракурор апратэставаў прысуды Алеся Бяляцкага і ягоных калег-праваабаронцаў

Пракурор падаў апеляцыйны пратэст на прысуд па справе праваабаронцаў "Вясны". У рамках гэтай справы былі асуджаны чатыры чалавекі: Нобелеўскі лаўрэат Алесь Бяляцкі, а таксама яго калегі Валянцін Стэфановіч, Уладзімір Лабковіч і Дзмітрый Салаўёў (завочна). Суд прызначыў ім тэрміны ад 7 да 10 гадоў пазбаўлення волі. Іх абвінавачвалі ў "фінансаванні пратэстаў" і "кантрабандзе наяўных грашовых сродкаў арганізаванай групай". Хоць гаворка ішла, па сутнасці, аб дапамозе рэпрэсаваным, аплаце штрафаў і адвакатаў.

"Думаю, што ім не спадабаліся нашы тэрміны, лічаць іх занадта мяккімі", — напісаў у лісце на свабоду Валянцін Стэфановіч. З яго ліста і стала вядома пра пракурорскую апеляцыю.

Праваабаронцы нагадваюць, што першапачаткова пракурор Аляксандр Кароль прасіў большыя тэрміны зняволення (кожнаму на два гады) і больш буйныя штрафы. Аднак суддзя Марына Запаснік пастанавіла іншы прысуд.

Дата разгляду пратэсту пакуль невядомая.