Польскага перабежчыка Эміля Чэчку пахаваюць у Беларусі

5 траўня ў Беларусі хаваюць польскага салдата Эміля Чэчку, паведамляе праўладная арганізацыя "Сістэмная праваабарона".

Гэты салдат дэзерціраваў з польскага войска падчас міграцыйнага крызісу на мяжы Беларусі і краін Еўрасаюза. Ён перайшоў на беларускую тэрыторыю і заявіў, што польскія вайскоўцы ўчыняюць масавыя забойствы мігрантаў і валанцёраў. 

А 17 сакавіка яго знайшлі павешаным.

Кіраўнік "Сістэмнай праваабароны" Дзмітрый Белякоў кажа, што пахаваюць Чэчку на польскіх могілках у Вілейскім раёне Мінскай вобласці.

"Родныя не выйшлі [на сувязь]. Польская амбасада адмовілася ўзаемадзейнічаць — ім быў накіраваны ліст. Звязацца з маці не ўдалося, яе лёс цяпер невядомы, будзем удакладняць інфармацыю. Пахаванне арганізоўвае наша арганізацыя", — патлумачыў Белякоў. 

Па яго словах, праверка па факце смерці Эміля Чэчкі працягваецца.

Дарэчы, прадстаўнікі ўпраўлення Вярхоўнага камісара ААН па правах чалавека не знайшлі на беларуска-польскай мяжы пахаванняў мігрантаў, пра якія расказваў Чэчка.

У Польшчы на Чэчку пачалі крымінальную справу за дэзерцірства, яго камандзіры былі звольненыя. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.