Омікрон-"стэлс" і зноў хвалі: новыя факты пра пандэмію каранавіруса

31/03/2022 - 15:04

Лекар у "чырвонай зоне" / Unsplash

Каранавірус нікуды не сыходзіў, нават калі многія пра яго забыліся праз вайну. Растлумачыць гэта лёгка: перажываць адразу праз некалькі праблем нельга. Але COVID-19 па-ранейшаму ёсць і па-ранейшаму небяспечны. Еўрарадыё расказвае пра новыя варыянты віруса, пра зняцце абмежаванняў у адных гарадах і поўнае закрыццё іншых.

Новы штам? Што?!

У другой палове лютага Сусветная арганізацыя аховы здароўя выпусціла заяву адносна варыянта віруса BA.2. Важна: не, гэта не новы штам, гэта варыянт ужо вядомага "омікрона" (BA.1), толькі яшчэ больш заразны.

"Даследаванні паказалі, што BA.2 мае перавагу распаўсюджвання ў параўнанні з BA.1. Даследаванні працягваюцца, каб зразумець прычыны гэтай перавагі ў росце, але першапачатковыя звесткі паказваюць, што BA.2 па сваёй прыродзе больш трансмісіўны, чым BA.1, які ў цяперашні час застаецца найбольш распаўсюджанай сублініяй Omicron", — заяўлялі 22 лютага ў СААЗ.

Не дзіўна, што гэта прайшло міма шмат каго: 22 лютага Расія прызнала так званыя "ЛНР" і "ДНР", а ўжо 24-га пачалася вайна.

Супраць розных штамаў і іх варыянтаў розныя вакцыны паказваюць розную эфектыўнасць. У многіх краінах бустарны ўкол робяць праз паўгода пасля поўнага курса вакцынацыі. Таму, калі вы вакцынаваліся больш за паўгода таму, варта ўдакладніць у лекара пра магчымасць зрабіць бустарны ўкол — ці нават поўную рэвакцынацыю.

Абмежаванні дзесьці здымаюць

У шэрагу краін каранавірусныя абмежаванні здымаюць. Можа з'явіцца пытанне: чаму, калі ў омікрона ёсць больш заразны варыянт і людзі працягваюць хварэць? Бо толькі за 30 сакавіка ў свеце было зарэгістравана больш за паўтара мільёна (!) новых выпадкаў.

Аднак многія пераносяць каранавірус лягчэй — і праз асаблівасці мутацыі самога віруса, і дзякуючы вакцынацыі. Фактычна той пагрозы жыцця, як раней, ён не нясе — але толькі калі прымаць меры прафілактыкі і рабіць унёсак у сваю бяспеку.

Некаторыя краіны, у якіх знялі каранавірусныя абмежаванні: Германія (больш за 75% цалкам вакцынаваных, больш за 58% ужо і рэвакцынаваных), Францыя (77% цалкам вакцынаваныя, 54% ужо рэвакцынаваныя) і Аўстрыя (74% цалкам вакцынаваных, 57,2% прайшлі рэвакцынацыю). У краінах з такім узроўнем вакцынацыі (і рэвакцынацыі, або прымянення "бустараў") рызыкі празмернай нагрузкі на сістэму аховы здароўя ніжэйшыя, бо ў людзей меншая рызыка трапіць у лякарню. Нават улічваючы, што цяпер ідзе новая "хваля" захваральнасці.

А дзесьці абмежаванні ўзмацняюць

Іншай дарогай ідзе Кітай: там на фоне рэзкага росту захваральнасці на каранавірус вырашылі цалкам "закрыць" 25-мільённы Шанхай. Абмежаванні, якія ўводзіліся да лакдаўну, не прыводзілі да зніжэння захваральнасці, таму ўлады пайшлі на крайнія меры. Раней закрылі і трохмільённы Сюйчжоу.

Аднак у Кітаі сітуацыя іншая: ужо праз пару месяцаў пасля з'яўлення каранавіруса жорсткімі абмежаваннямі (аж да забароны выходзіць з дома ў пэўных гарадах ці раёнах) улады краіны дамагліся таго, што штодзённая колькасць новых выпадкаў каранавіруса была мінімальная. Абмежаванні аслаблялі, і статыстыка трымалася на нізкім узроўні.

Омикрон-"стелс" и снова волны: новые факты о пандемии коронавируса

Графік захваральнасці ў Кітаі / Our World in Data

Рэзкі рост захваральнасці ў КНР пачаўся ў пачатку сакавіка — праз новы варыянт омікрона. Прыхільнікі стратэгіі "zero-COVID", кітайскія ўлады ідуць на крайнія меры нават пры пары тысяч выяўленых выпадкаў па ўсёй краіне.