"На ўсіх тэрыторыях": праз COVID-19 беларусам нельга збірацца больш за пяцёра
Праўладны мітынг / Еўрарадыё
Пры гэтым на 25 кастрычніка ўлады плануюць у Мінску вялікі мітынг у падтрымку Аляксандра Лукашэнкі.
На сайце Віцебскага гарвыканкама апублікаваны план мерапрыемстваў па барацьбе з COVID-19. Пункт 4 дакумента загадвае абмежаваць правядзенне любых масавых мерапрыемстваў колькасцю ўдзельнікаў больш за 5 чалавек: сходаў, камісій, выстаў, семінараў, канферэнцый і г. д.
У Віцебскім гарвыканкаме Еўрарадыё пацвердзілі, што дакумент ужо ўступіў у сілу. "Аналагічныя планы ёсць на ўсіх тэрыторыях", — пракаментаваў галоўны санітарны ўрач Віцебска Мікалай Красоўскі.
Наяўнасць плана нам пацвердзілі таксама ў Гомельскім гарадскім цэнтры гігіены і эпідэміялогіі.
"Так, у нас ёсць такі план", — адказвае намесніца галоўнага санітарнага ўрача Гомеля Святлана Стэпавікова. На пытанне Еўрарадыё, чым абгрунтаванае абмежаванне ў 5 чалавек, яна адказвае, што не можа гэтага патлумачыць.
На ўсіх тэрыторыях — гэта значыць і ў Мінску? На 25 кастрычніка ў сталіцы Беларусі запланаваны маштабны мітынг у падтрымку міру, дабра і росквіту. Імаверна, на яго прывязуць больш за пяць чалавек.
Прыхільнікаў Аляксандра Лукашэнкі плануецца звезці ў Мінск з розных гарадоў. У тым ліку з Віцебска і з Гомеля, дзе забаронена збірацца больш за пяцёра.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.