На Генасамблеі ААН Беларусь апынулася ў кампаніі Расіі, КНДР, Сірыі і Нікарагуа
РБ апынулася не на баку свабоднага свету
Генасамблея ААН прыняла рэзалюцыю з асуджэннем расійскай спробы анексаваць частку тэрыторыі Украіны. У ёй заяўляецца, што "так званыя рэферэндумы" на захопленых украінскіх тэрыторыях незаконныя, і патрабуе, каб Расія скасавала пастановы аб анэксіі.
Рэзалюцыю падтрымалі 143 краіны свету. Супраць прагаласавалі толькі сама Расія, а таксама Беларусь, Паўночная Карэя, Нікарагуа і Сірыя. Устрымаліся 35 краін, у тым ліку Кітай, Індыя, "саюзнікі" Масквы: Арменія, Казахстан і Кыргызстан.
"Стаўкі гэтага канфлікту відавочныя для ўсіх — і свет паслаў выразны сігнал у адказ: Расія не можа сцерці з карты суверэнную дзяржаву", — заявіў прэзідэнт ЗША Джо Байдэн.
Прэзідэнт Украіны Уладзімір Зяленскі падзякаваў 143 краінам, якія падтрымалі рэзалюцыю Генасамблеі ААН. "Свет сказаў сваё слова: расійская спроба анэксіі нікчэмная і ніколі не будзе прызнаная свабоднымі нацыямі", — заявіў ён. Зяленскі дадаў, што Украіна верне ўсе свае землі, акупаваныя расіянамі.
