Вы тут

"Цягліцы і косці балелі як пры грыпе": як беларусы прышчапляюцца ад COVID-19

Вакцынацыя / ria.ru

8 красавіка Мінздароўя абвясціла пра старт масавай вакцынацыі ад COVID-19. Праўда, пачала прышчапляць ахвотных толькі 34-я мінская паліклініка. Астатнія пакуль што толькі вядуць запіс.

На працягу апошніх тыдняў прышчэпкі змаглі зрабіць беларусы, якія працуюць у буйных кампаніях, што заключылі дамовы з паліклінікамі. Еўрарадыё пагутарыла з тымі, хто ўжо прышчапіўся даступнымі ў нашай краіне вакцынамі.

"Гэта лепш, чым ляжаць пад ШВЛ"

Каб запісацца на вакцынацыю, тлумачаць у паліклініцы №34, трэба ўсяго толькі патэлефанаваць і прадыктаваць свае прозвішча, імя, імя па бацьку, адрас пражывання і кантактны тэлефон. Пазней (калі — незразумела) вам ператэлефануюць для планавання візіту для прышчэпкі.

— Ці трэба здаваць дадатковыя абследаванні перад прышчэпкай? Ёсць інфармацыя, што пры наяўнасці антыцел да COVID-19 прышчэпка можа быць бескарыснай, — задаём такое пытанне.

— Ніякіх папярэдніх аналізаў здаваць не трэба. Вы прыходзіце на прыём да доктара, а ён ужо можа нешта прызначыць, калі будзе неабходнасць, — адказваюць у даведачнай паліклінікі.

У беларускіх паліклініках прышчапляюць двума відамі вакцын: расійскай "Спадарожнік V" і кітайскай "Vero Cell". У абодвух выпадках трэба зрабіць два ўколы, паміж якімі павінен прайсці 21 дзень.

Павел, айцішнік з Мінска, учора атрымаў ужо другую, апошнюю прышчэпку расійскай вакцыны. Такую магчымасць яму прапанавалі на працы.

Даведка Паўла / Еўрарадыё

— Перад ін'екцыямі лекар рабіў стандартныя вымярэнні: тэмпература, пульс, ціск. Плюс пыталіся пра вострыя і хранічныя захворванні і алергіі, — расказвае Павел.

— Як ты адчуваў сябе пасля прышчэпак?

— Пасля першай прышчэпкі ў мяне былі дробныя пабочкі: падвышаная стамляльнасць і санлівасць, галаўны боль і болі ў месцы ін'екцыі як пасля моцнага ўдару. Пасля другой прышчэпкі "злавіў" на першы дзень тэмпературу каля 38 градусаў і мінімальны галаўны боль. Потым зноў з'явіўся боль у месцы ін'екцыі, ён пакуль яшчэ да канца не прайшоў. У мяне ўсё прайшло дастаткова мякка. Сябры расказвалі, што ў іх пасля другой прышчэпкі тэмпература падымалася да 40 градусаў.

— Не пашкадаваў, што вакцынаваўся?

— У кожным разе ўсё вышэйапісанае значна лепш, чым хварэць, калі б раптам давялося пад ШВЛ ляжаць. Праз тры тыдні здам кроў. Кажуць, што праз гэты час з'яўляецца патрэбны цітр IgG.

"У таты не было рэакцыі, мама адчувала сябе дрэнна"

Мінчанка Яна прышчапілася ўжо дзвюма дозамі расійскай вакцыны "Спадарожнік". Дзяўчына, а таксама яе малады чалавек і бацькі сутыкнуліся з пабочнымі дзеяннямі прышчэпкі.

"Спадарожнік" / rg.ru

— У паліклініцы вымералі тэмпературу, паглядзелі горла, удакладнілі, ці адчувала я недамаганне ў апошні тыдзень. Укалолі, пакінулі на паўгадзіны ў калідоры, перыядычна выходзілі ўдакладніць, ці ўсё добра. З ночы і да вечара наступнага дня была тэмпература (да 38 °С у хлопца, у мяне не вышэй за 37,5 °С), балела рука вакол месца ўколу. Наогул цягліцы і косці балелі як пры грыпе. Нічога асабліва страшнага не было. Да вечара наступнага дня ўсе сімптомы прайшлі як быццам. Пасля другога ўколу — усё тое самае, можа, толькі менш ярка выяўлена, — расказвае Яна.

У таты не было ніякай рэакцыі на прышчэпкі, антыцелы з'явіліся. У мамы была тэмпература вышэй за 38 градусаў, пасля абедзвюх прышчэпак яна адчувала сябе дрэнна. Лекары кажуць, гэта рэдкасць. Больш рэакцый на прышчэпку сярод моладзі, таму што імунітэт рэагуе мацней.

— А чаму вырашылі зрабіць прышчэпку?

— Таму што надакучыла баяцца. Хочам працаваць не з дому, хадзіць у кіно, у кавярні, куды хоча дзіця, падарожнічаць. За год было столькі гісторый ад сяброў і знаёмых: як 30-гадовыя траплялі на ШВЛ, як месяцамі пасля лёгка перанесенага кавіду сябры жылі з жэстачайшым посткавідным сіндромам. Увесь гэты год мы досыць адказна самаізаляваліся, але вельмі ад гэтага стаміліся. Калі можна прышчапіцца і адчуваць сябе спакайней і вальней — чаму не?

Ад недамагання на суткі пра сваё рашэнне мы не пашкадавалі, вядома. Што будзе далей, пакуль няясна. На колькі хопіць прышчэпкі — не ведаюць пакуль нават лекары. Але мы плануем рэгулярна рабіць тэсты, правяраць антыцелы.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.