Міякардыт, дыхавіца і кепскі сон: у чым небяспека посткавіду

16/05/2023 - 12:05

У Лукашенко может быть постковидный синдром: чем он опасен?

Посткавідны сіндром, паводле СААЗ, можа сустракацца ў 10-20% тых, хто перахварэў / Antonio Rodriguez/Adobe Stock

Хаця СААЗ ужо не лічыць каранавірус пандэміяй, сам COVID-19 нікуды не падзеўся. Асабліва актуальнымі робяцца яго доўгатэрміновыя наступствы — не небяспека цячэння самой інфекцыі, а тое, як ён уплывае на арганізм і якія іншыя захворванні тэарэтычна можа справакаваць.

Медыкі называюць гэта посткавідам, часам — доўгатэрміновым кавідам. Адносіцца да яго, дарэчы, і міякардыт, на які, паводле пэўных звестак, цяпер хворы Аляксандр Лукашэнка. Але мы раскажам вам падрабязней не пра здароўе палітыка, а пра тое, што наогул такое посткавідны сіндром і якія хваробы за сабой можа "цягнуць" падступны вірус.

Маё сэрца спынілася

Сардэчна - сасудзістая сістэма моцна пакутуе ад каранавіруснай інфекцыі. Сур'ёзныя ўскладненні для яе бываюць і пасля перанесенага COVID-19.

Паводле звестак Амерыканскага цэнтра па кантролі інфекцыйных захворванняў (CDC), да самых частых прыкмет посткавіда адносяцца наступныя: ускладненае дыханне і дыхавіца, кашаль, боль у грудзях, пачашчанае сэрцабіццё. Такія сімптомы адзначаюць і спецыялісты з паважанай Mayo Clinic.

Больш за тое, пасля каранавіруса могуць развіцца і псіхічныя разлады: напрыклад, дэпрэсія ці павышаная трывожнасць і праблемы са сном.

Зафіксаваныя і іншыя магчымыя ўскладненні пры так званым "доўгатэрміновым кавідзе".

Гэта ва ўсіх, хто хварэў? І надоўга?

Посткавідны сіндром сустракаецца не ва ўсіх, хто хварэў, але тут навукоўцы пакуль толькі збіраюць звесткі. Аналізаваць ускладненні ў тых, хто паправіўся, складаней: адны самі не заўважаюць першых сімптомаў і не звяртаюцца да дактароў, іншыя не ведаюць, ці быў у іх каранавірус, і гэтак далей.

Але калі вы, напрыклад, перанеслі COVID-19, гэта яшчэ не значыць, што для вашага здароўя абавязкова будуць негатыўныя наступствы ў будучыні. СААЗ на цяперашнім этапе мяркуе, што посткавід сустракаецца прыблізна ў 10-20% тых, хто перахварэў.

А калі наступствы і будуць, то колькі яны будуць доўжыцца — пытанне адкрытае: паведамляецца і пра тыдні, і пра месяцы, і нават пра гады.

Што рабіць?

Першае: не забываць пра сам каранавірус і прытрымлівацца мераў засцярогі (хаця б сацыяльнае дыстанцыяванне, мыццё рук і іншыя меры гігіены). Другое: сачыць за сваім здароўем, праходзіць неабходныя абследавання і пры любых падазрэннях або зменах стану звяртацца да дактароў. Калі ў вас з'явілася дыхавіца ці вы пачалі кепска спаць, гэта ўжо падстава занепакоіцца і пракансультавацца з доктарам, каб пазбегнуць магчымых негатыўных наступстваў.

Памятайце, што любыя рашэнні наконт лячэння мусіць прымаць выключна кваліфікаваны доктар, таму ні ў якім разе не спрабуйце займацца самалячэннем і давярайцеся прафесіяналам.