Мінчука затрымалі напярэдадні сур'ёзнай аперацыі
Артур Башко / t.me/viasnanazirae/
31-гадовага мінчука Артура Башко затрымалі напярэдадні сур'ёзнай аперацыі. Сваякі не ведаюць, дзе ён знаходзіцца. Паводле папярэдняй інфармацыі, мужчыну асудзілі да 13 сутак арышту, піша @viasnanazirae.
Затрыманне Башко, які працуе таксістам, адбылося яшчэ раніцай 17 траўня ў Мінску. Чацвёра сілавікоў стаялі ў пад'ездзе, калі дадому вярталася яго маці. Калі яна адчыніла дзверы, яны ўварваліся ў кватэру. Сам Артур Башко ў гэты час яшчэ спаў. Сілавікі правялі ператрус, нешта забралі, а па падлозе засталіся раскіданыя паперы. Пасля затрымання адзін з іх сказаў маці мужчыны, што сына забралі па "палітыцы".
Башко мае праблемы са здароўем — яму павінны былі рабіць аперацыю па выдаленні шчытавідкі. Пасля затрымання ён патэлефанаваў родным і папрасіў перадаць яму неабходныя лекі. На Акрэсціна медыкаменты прынялі. Пазней над ім адбыўся суд, але сваякі не ведаюць паводле якога артыкула.
