Медыяарганізацыі з 8 краінаў прынялі зварот з нагоды пераследу "Прэс-клуба"
Медыяарганізацыі з 8 краінаў прынялі зварот з нагоды пераследу беларускага "Прэс-клуба":
"Мы выказваем салідарнасць з нашымі беларускімі калегамі, а таксама заклікаем калегаў-журналістаў і праваабарончыя арганізацыі з іншых краінаў выказаць сваё стаўленне да арышту супрацоўнікаў гэтай незалежнай медыяарганізацыі і выступіць у іх падтрымку. Усе супрацоўнікі Press Club Belarus мусяць быць адпушчаныя на волю, іх пераслед мусіць быць спынены".
Ерэванскі прэс-клуб, Арменія
Цэнтр медыяініцыятыў, Арменія
Асацыяцыя рэгіянальных медыяў Грузіі
Асацыяцыя незалежнай прэсы Малдовы
Асацыяцыя журналістаў Латвіі
Медыяцэнтр Cтакгольмскай школы эканомікі ў Рызе, Латвія
Супольнасць лакальных газет, Польшча
Альянс незалежных рэгіянальных выдаўцоў Расіі
Інстытут развіцця рэгіянальнай прэсы, Украіна
Беларуская асацыяцыя журналістаў, Беларусь
У суботу, 26 снежня, стала вядома, што ўсе фігуранты так званай "справы Прэс-клуба" застаюцца пад вартай. Гэта стваральніца арганізацыі Юлія Слуцкая, фінансавы дырэктар Сяргей Альшэўскі, кіраўнік Акадэміі Прэс-клуба Сяргей Якупаў, праграмны дырэктар Ала Шарко, аператар Пётр Слуцкі і Ксенія Луцкіна.
Такая мера стрымання абраная Генеральнай пракуратурай Беларусі.
25 снежня іх усіх дапыталі ў Дэпартаменце фінансавых расследаванняў КДК. Затрыманых падазраюць ва ўхіленні ад выплаты падаткаў у асабліва буйным памеры.
Сёння стала вядома, што "справу Прэс-клубу" перадалі ў Следчы камітэт.
