Вы тут

Праваабаронца пасадзілі на 12 сутак за барэльеф з "Пагоняй" на прыватным доме

Зміцер Салаўёў / sping96.org

Праваабаронцу "Вясны" Змітра Салаўёва арыштавалі на 12 сутак. Суддзя палічыла пікетам барэльеф з гербам "Пагоня" на яго доме, які існаваў там восем гадоў, піша ТГ-канал "Вясна назірае".

Салаўёва затрымалі 16 лютага, калі па ўсёй краіне праходзілі ператрусы ў журналістаў, праваабаронцаў і актывістаў прафасюзнага руху. Зранку ў ягоны дом уварваліся супрацоўнікі АМАПу і ГУБАЗіКа. Яны выламалі дзверы, правялі ператрус і канфіскавалі аргтэхніку. На самога Салаўёва склалі пратакол за пікетаванне.

Дарэчы, бетонны барэльеф з "Пагоняй" быў убудаваны ў дом пры будаўніцтве восем гадоў таму. 

Суддзя Мінскага раёна Анжаліка Казлова запытвала ў Салаўёва, ці цікавіцца ён палітычнай сітуацыяй у краіне і ці ведае, што пратэсты праходзяць пад гербам "Пагоня". 

Пасля гэтага яна без перапынку абвясціла прысуд — 12 сутак арышту.

Дарэчы, гістарычны герб "Пагоня" ўнесены ў Дзяржаўны спіс гісторыка-культурных каштоўнасцяў.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.